அப்துல்லாக்கள், முப்திகளால் நாட்டை பிளவுபடுத்த முடியாது, நான் விடமாட்டேன்: பிரதமர் மோடி பேச்சு

பதிவு செய்த நாள் : 14 ஏப்ரல் 2019 14:44

கத்துவா,            

அப்துல்லாக்களும் முப்திகளும் இந்திய நாட்டை பிளவுபடுத்த நான் ஒருபோதும் அனுமதிக்கமாட்டேன் என்று ஜம்மு காஷ்மீரில் நடைபெற்ற தேர்தல் பேசிய பிரதமர் மோடி தெரிவித்துள்ளார்.

ஜம்மு காஷ்மீர் வந்துள்ள பிரதமர் நரேந்திர மோடி கத்துவா மாவட்டத்தில் இன்று நடைபெற்ற பாஜக பிரசார பொதுக்கூட்டத்தில் கலந்துகொண்டு உரையாற்றினார். இதில் பேசிய அவர்,”60 ஆண்டுகால ஆட்சியில் காங்கிரஸ் இழைத்த அநீதிகளுக்கு யார் பரிகாரம் செய்வார்கள்? 1984ம் ஆண்டில் சீக்கியர்களுக்கு எதிரான கலவரத்துக்கும், காஷ்மீரில் பண்டிதர்களுக்கு எதிரான அட்டூழியங்களுக்கும் நீதி வழங்க காங்கிரஸ் தயாரா?” கேள்வி எழுப்பியுள்ளார்.

மேலும்,”காஷ்மீர் மாநிலத்தை ஆட்சி செய்த அப்துல்லா குடும்பமும் முப்தி குடும்பமும் 3 தலைமுறை மக்களின் வாழ்க்கையை சீரழித்துவிட்டன. இந்த குடும்பங்களுக்கு விடை கொடுத்தால்தான் காஷ்மீருக்கு நல்ல எதிர்காலம் உருவாகும். இவர்கள் மோடியை ஒழிப்பதற்காக எதை வேண்டுமானாலும் செய்வார்கள். ஆனால், இந்த நாட்டை ஒருபோதும் இவர்களால் பிளவுப்படுத்த முடியாது” என்று கூறினார்.

”சமீபத்தில் இங்கு நடைபெற்ற முதல்கட்ட மக்களவை தேர்தலில் பாரமுல்லா, ஜம்மு மாவட்டங்களில் பெருவாரியான அளவில் வாக்களித்ததன் மூலம் நமது நாட்டின் ஜனநாயக வலிமையை நீங்கள் நிலைநாட்டி இருக்கிறீர்கள். தீவிரவாதிகளுக்கும் பிரிவினைவாதிகளுக்கும் சந்தர்ப்பவாதிகளுக்கும் சரியான பதிலடியை தந்துவிட்டீர்கள்.

இந்த தேர்தலில் பாஜகவுக்கு ஆதரவாக சக்திவாய்ந்த பேரலை வீசுகிறது. கருத்துக் கணிப்புகளின்படி காங்கிரஸ் கட்சியை விட மூன்று மடங்கு அதிகமான இடங்களில் பாஜக வெற்றிபெறும் என்பதை உங்களுக்கு நான் தெரிவித்துக்கொள்கிறேன்” என்று பிரதமர் மோடி கூறினார்.