தேர்தல் அறிக்கையில் விவசாயிகளின் கோரிக்கைகள் இடம்பெற்றிருக்க வேண்டும்: விவசாயிகள் கமிட்டி கோரிக்கை

பதிவு செய்த நாள் : 14 மார்ச் 2019 20:44

புதுடில்லி,

மக்களவை தேர்தலில் அரசியல் கட்சிகளின் தேர்தல் அறிக்கையில் விவசாயிகளின் கோரிக்கைகள் இடம்பெற்றிருக்க வேண்டும் என்று அனைத்திந்திய விவசாயிகள் சங்கங்களின் ஒருங்கிணைப்பு கமிட்டி (ஐ.சி.சி.எஃப்.எம்) கோரியுள்ளது.

வரும் ஏப்ரல் 11ம் தேதி முதல் 7 கட்டங்களாக மக்களவை தேர்தல் நடைபெறவுள்ளது. அதை தொடர்ந்து நாடு முழுவதும் அரசியல் கட்சிகள் தேர்தல் பணிகளில் முழு வீச்சில் ஈடுபட்டுள்ளன.

நடக்கவுள்ள மக்களவை தேர்தலில் விவசாயிகளின் பிரச்சனை முக்கிய பங்கு வகிக்கும் என்று கூறப்படுகிறது.

இந்த சூழ்நிலையில் தமிழக விவசாயிகள் சங்கம், பாரதிய கிசான் யூனியன், கர்நாடக ராஜ்ய ரைத சங்கம், ஆதிவாசி கோத்ர மகாசபை உள்ளிட்ட பல சங்கங்களின் ஒருங்கிணைப்பு கமிட்டியான ஐ.சி.சி.எஃப்.எம் (ICCFM) அரசியல் கட்சிகளுக்கு கோரிக்கை ஒன்றை முன்வைத்துள்ளது.

அதன்படி அனைத்து அரசியல் கட்சிகளின் தேர்தல் அறிக்கையிலும் விவசாயிகளின் 18 கோரிக்கைகள் இடம்பெற்றிருக்க வேண்டும். அந்த கோரிக்கைகள் எப்போது நிறைவேற்றப்படும் என்பதையும் தேர்தல் அறிக்கையில் குறிப்பிட வேண்டும் என்று ஐ.சி.சி.எஃப்.எம் வலியுறுத்துவதாக அந்த அமைப்பின் உறுப்பினர் யுத்விர் சிங் செய்தியாளர்களிடம் தெரிவித்தார்.

சிறு, குறு விவசாயிகளுக்கு மத்திய அரசு வழங்கும் 6000 ரூபாய் மானியம் போதுமானது அல்ல. கூடுதலாக அனைத்து விவசாயிகளுக்கும் ஏக்கருக்கு ரூ.10,000 வழங்க வேண்டும்.

60 வயதுக்கு பின் விவசாயிகளுக்கு மாதம் 5000 ரூபாய் ஓய்வூதியம் வழங்கப்பட வேண்டும்.

சுவாமிநாதன் கமிஷனின் பரிந்துரைகளின்படி குறைந்தபட்ச ஆதரவு விலை நிர்ணயிக்க வேண்டும். விளை பொருட்களை 100 சதவீதம் அரசாங்கம் கொள்முதல் செய்ய வேண்டும்.

அனைத்து விவசாய கடன்களும் நிபந்தனையின்றி தள்ளுபடி செய்ய வேண்டும். தற்கொலை செய்துகொண்ட விவசாய குடும்பங்களுக்கு மறுவாழ்வு அளிக்க வேண்டும். அவர்களின் குடும்பத்தாரில் ஒருவருக்கு அரசு வேலை வழங்க வேண்டும்.

இலவச மின்சாரம், கரும்புகளுக்கான நிலுவை தொகை வழங்குவது, 10 வருடங்கள் பழமையான டீசல் வண்டிகளுக்கான தடையை ரத்து செய்வது உள்ளிட்ட அனைத்து கோரிக்கைகளும் தேர்தல் அறிக்கையில் இடம்பெற்றிருக்க வேண்டும் என்று யுத்விர் சிங் தெரிவித்தார்.