சீனாவுக்கு ஐநாவில் இடம் பெற்றுக்கொடுத்தது உங்கள் கொள்ளுத்தாத்தா தான்: ராகுலுக்கு பதிலடி கொடுத்த பாஜக

பதிவு செய்த நாள் : 14 மார்ச் 2019 14:46

பனாஜி

மசூத் அசாரை சர்வதேச தீவிரவாதியாக அறிவிக்க சீனா முட்டுக்கட்டை போட்டதைக் கண்டிக்காத பிரதமர் மோடியை விமர்சித்த ராகுல் காந்திக்கு பதிலடி கொடுத்த பாஜக, சீனாவுக்கு ஐநாவில் இடம் பெற்றுக்கொடுத்ததே உங்களின் கொள்ளுத்தாத்தா தான் என்று விமர்சித்துள்ளது.

புல்வாமாவில் நடந்த தீவிரவாதத் தாக்குதலில் இந்திய வீரர்கள் 40 பேர் பலியானதைத் தொடர்ந்து, பாகிஸ்தானில் செயல்படும் ஜெய்ஷ்-இ-முகமது தீவிரவாத அமைப்பின் தலைவர் மசூத் அசாரை சர்வதேச தீவிரவாதியாக அறிவிக்கக் கோரி அமெரிக்கா, பிரான்ஸ் உள்ளிட்ட நாடுகள் ஐநா பாதுகாப்பு கவுன்சிலில் தீர்மானம் கொண்டுவந்தன. ஆனால், அந்தத் தீர்மானத்தை நிறைவேற்றும் கடைசி நேரத்தில் சீனா தலையிட்டு அதற்கு முட்டுக்கட்டை போட்டது.

இந்த விவகாரம் குறித்து பிரதமர் மோடியை விமர்சித்த ராகுல் காந்தி, டுவிட்டரில்,"

பலவீனமான பிரதமர் மோடி, சீன அதிபரைக் கண்டு அஞ்சுகிறார். ஜின்பிங்குடன் ஊஞ்சலில் ஆடுவது, டில்லியில் கட்டிப்பிடிப்பது, சீனாவில் தலைவணங்குவது ஆகியவைதான் சீனாவுக்கான மோடியின் ராஜதந்திரமா" என்று விமர்சித்திருந்தார்.

இதற்குப் பதிலளித்து பாஜக சார்பில் பதிலடி கொடுக்கப்பட்டுள்ளது. பாஜகவின் அதிகாரப்பூர்வ டுவிட்டரில் பக்கத்தில்,

"உங்கள் கொள்ளுத்தாத்தா மட்டும் ஐநாவில் சீனாவுக்கு இடத்தைப் பரிசாகத் தராமல் இருந்திருந்தால், சீனா ஐநாவில் இடம் பெற்றிருக்காது. தேசத்தின் அனைத்து தவறுகளையும் உங்கள் குடும்பத்தினர் செய்துள்ளனர். தீவிரவாதத்துக்கு எதிரான போரில் இந்தியா வெல்லும் என்பதை உறுதியாகக் கூறுகிறோம். இந்த விவகாரத்தை பிரதமர் மோடியிடம் விட்டுவிட்டு சீனத் தூதுவர்களுடன் ரகசியமாக நீங்கள் நட்பு பாராட்டுங்கள்" என பதிவிட்டுள்ளது.