மசூத் அசார் விவகாரம்: சீன அதிபர் ஜின்பிங்கை கண்டு அஞ்சுகிறார் மோடி: ராகுல் பாய்ச்சல்

பதிவு செய்த நாள் : 14 மார்ச் 2019 13:04

புதுடில்லி

ஜெய்ஷ்-இ-முகமது தலைவர் மசூத் அசாரை சர்வதேச தீவிரவாதியாக அறிவிக்க ஐநா பாதுகாப்பு கவுன்சிலில் கொண்டுவரப்பட்ட தீர்மானத்தை சீனா தடை செய்தது குறித்து வாய் திறக்காத பலவீனமான பிரதமர் மோடி, சீன அதிபர் ஜி ஜின்பிங்கை கண்டு அஞ்சுவதாக காங்கிரஸ் தலைவர் ராகுல் காந்தி கடுமையாக விமர்சித்துள்ளார்.

கடந்த பிப்ரவரி 14ஆம் தேதி, ஜம்மு காஷ்மீர், புல்வாமாவில் நடத்தப்பட்ட தீவிரவாத தாக்குதலில் 40 சிஆர்பிஎப் வீரர்கள் கொல்லப்பட்டனர். இந்த தாக்குதலுக்கு பாகிஸ்தானில் செயல்படும் ஜெய்ஷ்-இ-முகமது பயங்கரவாத அமைப்பு பொறுப்பேற்றது. இந்த தாக்குதலுக்குப் பதிலடியாக பாகிஸ்தானில்தான் பாலகோட் பகுதியில் செயல்பட்டுவரும் ஜெய்ஷ்-இ- முகமது முகாம்களை இந்திய விமானப்படை கடந்த பிப்ரவரி 26ஆம் தேதி குண்டுவீசி அழித்ததாகக் கூறப்பட்டது.

இந்த சூழலில், ஐநா பாதுகாப்பு கவுன்சில் கூட்டத்தில் கடந்த பிப்ரவரி 27ஆம் தேதி ஜெய்ஷ்-இ-முகமது தலைவர் மசூத் அசாரை சர்வதேச தீவிரவாதியாக அறிவிக்கக் கோரி அமெரிக்கா, பிரான்ஸ், இங்கிலாந்து உள்ளிட்ட நாடுகள் தீர்மானம் கொண்டு வந்தன.

10 நாட்களுக்குள் ஐநாவில் உள்ள உறுப்பு நாடுகள் எதிர்ப்புத் தெரிவித்தால், தீர்மானம் குறித்து ஆய்வு செய்யப்படுவதாக இருந்தது. இதுவரை எந்த உறுப்பினர்களும் எதிர்ப்புத் தெரிவிக்காத நிலையில் கெடுநேரம் முடியும் தருவாயில், சீனா கடைசி நிமிடத்தில் தீர்மானத்தை நிறுத்தி வைப்பதாக கூறியுள்ளது. அவ்வறு நிறுத்தி வைக்க காரணம் எதனையும் சீனா தெரிவிக்கவில்லை. மசூத் அசாரை சர்வதேச தீவிரவாதியாக அறிவிக்கவிடாமல்  சீனா தடுப்பது இது 4ஆவது முறையாகும்.

ராகுல் பாய்ச்சல்

இந்த சம்பவத்தில் சீனா குறித்து எந்தவிதமான கருத்தும் தெரிவிக்காமல் பிரதமர் நரேந்திர மோடி இருப்பது குறித்து காங்கிரஸ் தலைவர் ராகுல் காந்தி கடுமையாக விமர்சித்துள்ளார்.

ராகுல் காந்தி டுவிட்டரில்,

"பலவீனமான மோடி, சீன அதிபரை ஜி ஜின்பிங்கை கண்டு அஞ்சுகிறார். மசூத் அசாரை சர்வதேச தீவிரவாதியாக அறிவிக்கும் இந்தியாவின் முயற்சிக்கு எதிராகச் சீனா நடந்து கொள்கிறது, இதுகுறித்து மோடி வாயிலிருந்து ஒருவார்த்தைக்கூட இதுவரை வரவில்லை. மோடியின் சீன ராஜதந்திரம், குஜராத்தில் ஜி ஜிங்பிங்குடன் ஊஞ்சலாடினார் மோடி, டில்லியில் ஜின்பிங்கை கட்டி அணைத்தார் மோடி, சீனாவில் ஜின்பிங்கிடம் பணிந்துவிட்டார் மோடி" என பதிவிட்டுள்ளார்.

காங்கிரஸ் கட்சி டுவிட்டரில்,

"மசூத் அசாரை சர்வதேச தீவிரவாதியாக அறிவிக்கும் இந்தியாவின் முயற்சியை சீனா தடுத்துவிட்டது குறித்து ஒவ்வொரு இந்தியர் மனதிலும் கேள்விகள் எழுகின்றன. அப்படியென்றால், சீன அதிபர் ஜி ஜின்பிங்குடன், பிரதமர் மோடி ஊஞ்சலாடியதில் என்ன பயன் இருக்கிறது?. கொடுரமான, ரத்தத்தை உறையவைக்கும் கொலைகளை நிகழ்த்திய தீவிரவாதி மீண்டும் பாஜகவால் தப்பி இருக்கிறார்" எனத் தெரிவிக்கப்பட்டுள்ளது.

இதேபோல், காங்கிரஸ் கட்சியின் செய்தித்தொடர்பாளர் ரன்தீப் சுர்ஜிவாலா டுவிட்டரில்,

"தீவிரவாதத்துக்கு எதிராக உலகமே போராடிவரும் நிலையில், இன்று நடந்த சம்பவம் நமக்கு வேதனையானதாகும். மசூத் அசாரை சர்வதேச தீவிரவாதியாக அங்கீகரிக்கச் சீனா தடை செய்தது, தீவிரவாதத்தின் புகலிடமாக இருக்கும் பாகிஸ்தானுடன் சீன உறவு பிரிக்க முடியாது என்பதைக் காட்டுகிறது" எனக் குறிப்பிட்டுள்ளார் ரன்தீப் சுர்ஜிவாலா.