பெருந்தன்மையானவர் என்றால் மசூத் அசாரை எங்களிடம் ஒப்படைக்கட்டும்: இம்ரான் கானுக்கு சவால் விடுத்த சுஷ்மா

பதிவு செய்த நாள் : 14 மார்ச் 2019 11:47

புதுடில்லி

பெருந்தன்மையானவர் என்றால் மசூத் அசாரை இந்தியாவிடம் ஒப்படையுங்கள் என்று பாகிஸ்தான் பிரதமர் இம்ரான் கானுக்கு இந்திய வெளியுறவுத்துறை அமைச்சர் சுஷ்மா சுவராஜ் இன்று சவால் விடுத்துள்ளார்.

டில்லியில் நடைபெற்ற நிகழ்ச்சி ஒன்றில் மத்திய வெளியுறவுத்துறை அமைச்சர் சுஷ்மா சுவராஜ் கலந்துகொண்டு பேசினார். இதில் பேசிய அவர்,

”பாகிஸ்தானை பயங்கரவாத அமைப்புகள் இல்லாத நாடாக மாற்றினால் அந்நாட்டுடன் அமைதி பேச்சுவார்த்தை நடத்தவும், சுமூகமான சூழலை உருவாக்கிக்கொள்ளவும் நாங்கள் தயாராக உள்ளோம்”.

“பயங்கரவாதத்தை ஒழிப்பதிலும் பாகிஸ்தானுடன் இணைந்து செயல்பட தயாராக இருக்கிறோம். ஆனால், பயங்கரவாத அமைப்புகள் மீது பாகிஸ்தான் நடவடிக்கை எடுத்தால் மட்டுமே பாகிஸ்தான் உடன் பேச்சுவார்த்தை சாத்தியம். பேச்சுவார்த்தையும் பயங்கரவாத செயல்களும் ஒருசேர நடக்க வாய்ப்பில்லை. தீவிரவாதம் குறித்த பேச்சுவார்த்தை எங்களுக்கு தேவையில்லை. தீவிரவாதத்திற்கு எதிரான நடவடிக்கைதான் வேண்டும்” என்று தெரிவித்தார்.

”பாகிஸ்தான் பிரதமர் இம்ரான்கான் பெருந்தன்மையானவர், அமைதியை விரும்புபவர் என்று சிலர் சொல்கிறார்கள். உண்மையிலேயே அவர் அமைதியை விரும்புபவராக இருந்தால் மசூத் அசாரை இந்தியாவிடம் அவர் ஒப்படைக்கட்டும். அவர் எவ்வளவு பெருந்தன்மையானவர் என்பது இதில் தெரிந்துவிடும்” என்று சுஷ்மா சுவராஜ் கூறினார்.