சர்வதேச தீவிரவாதியாக மசூத் அசாரை அறிவிக்க சீனா மீண்டும் முட்டுக்கட்டை: இந்தியா அதிருப்தி

பதிவு செய்த நாள் : 14 மார்ச் 2019 11:26

புதுடில்லி,            

புல்வாமா தாக்குதலுக்கு காரணமான, ஜெய்ஷ்-இ-முகமது தலைவர் மசூத் அசாரை சர்வதேச தீவிரவாதியாக ஐநா பாதுகாப்பு கவுன்சில் மூலம் அறிவிக்க மேற்கொண்ட முயற்சியைக்கு 4ஆவது முறையாக சீனா முட்டுக்கட்டை போட்டுள்ளது. இந்தியா தொடர்ந்து செய்து வரும் முயற்சிகளை சீனா தடுத்து வருவதற்கு இந்தியா கடும் அதிருப்தி தெரிவித்துள்ளது.

கடந்த பிப்ரவரி 14ஆம் தேதி ஜம்மு காஷ்மீர், புல்வாமாவில் நடத்தப்பட்ட தீவிரவாத தாக்குதலில் 40 சிஆர்பிஎப் வீரர்கள் கொல்லப்பட்டனர். இந்த தாக்குதலுக்கு பாகிஸ்தானில் செயல்படும் ஜெய்ஷ்-இ-முகமது பொறுப்பேற்றது. இந்த தாக்குதலுக்கு பதிலடியாக பாகிஸ்தானின் பாலகோட் பகுதியில் செயல்பட்டுவரும் ஜெய்ஷ்-இ-முகமது முகாம்களை இந்திய விமானப்படை கடந்த பிப்ரவரி 26ஆம் தேதி குண்டுவீசி அழித்ததாகக் கூறப்பட்டது.

இந்த சூழலில், ஐநா பாதுகாப்பு கவுன்சில் கூட்டத்தில் கடந்த பிப்ரவரி 27ஆம் தேதி ஜெய்ஷ்-இ-முகமது தலைவர் மசூத் அசாரை சர்வதேச தீவிரவாதியாக அறிவிக்கக்கோரி அமெரிக்கா, பிரானஸ், இங்கிலாந்து உள்ளிட்ட நாடுகள் தீர்மானம் கொண்டு வந்தன.

சீனா முட்டுக்கட்டை

10 நாட்களுக்குள் ஐநாவில் உள்ள உறுப்பு நாடுகள் எதிர்ப்புத் தெரிவித்தால், தீர்மானம் குறித்து ஆய்வு செய்யப்படுவதாக இருந்தது. ஆனால், இதுவரை எந்த உறுப்பினர்களும் எதிர்ப்புத் தெரிவிக்காத நிலையில், சீனா சில கேள்விகளை முன்வைத்து தீர்மானத்தை நிறைவேற்றவிடாமல் தடுத்தது.

மசூத் அசாரை சர்வதேச தீவிரவாதியாக அறிவிக்கக்கோரும் தீர்மானத்தை ஆய்வு செய்ய இன்னும் சிறிது காலம் எடுத்துக்கொள்ளலாம் என்று, கால அவகாசம் அளித்தல் போதுமானது என்று சீனா ஐநாவில் கோரியது. இதனால், கடைசி நேரத்தில் தீர்மானம் நிறைவேற்றப்படுவது தடைசெய்யப்பட்டது.

சீனா கேட்டுள்ள கால அவகாசம் என்பது, குறைந்தபட்சம் 6 மாதங்கள் வரை முதல் கட்டமாக அளிக்கப்படும், அதன்பின், 3 மாதங்கள் வரை நீட்டிக்கப்படலாம். ஆதலால், இன்னும் 9 மாதங்களுக்கு மசூத் அசார் மீது தடைவிதிக்க வாய்ப்பில்லாத சூழலை சீனா உருவாக்கியுள்ளது.

இந்தியா அதிருப்தி

சீனாவின் இந்த செயலை மத்திய வெளியுறவுத்துறை அமைச்சகம் கடுமையாக கண்டித்து, தனது அதிருப்தியை தெரிவித்துள்ளது. இதுகுறித்து மத்திய வெளியுறவுத்துறை அமைச்சகம் வெளியிட்ட அறிவிப்பில்,"மசூத் அசாரை சர்வதேச தீவிரவாதியாக அறிவிக்கும் முயற்சி தடையானதில் எங்களுக்கு வேதனை ஏற்பட்டுள்ளது. ஆனால், இந்திய குடிமக்கள் மீது தாக்குதல் நடத்திய தீவிரவாதிகளை நீதியின் முன் நிறுத்த தொடர்ந்து, அனைத்து வகையான முயற்சிகளையும் மேற்கொள்வோம். மசூத் அசாரை சர்வதேச தீவிரவாதியாக அறிவிக்க ஆதரவளித்த அனைத்து உறுப்பு நாடுகளுக்கும் எங்களின் நன்றியை தெரிவிக்கிறோம்" எனத் தெரிவிக்கப்பட்டது.

கடந்த 10 ஆண்டுகளில் மசூத் அசாரை சர்வதேச தீவிரவாதியாக அறிவிக்க எடுக்கப்பட்ட 4ஆவது முயற்சியும் தோல்வியில் முடிந்துள்ளது. ஐநா பாதுகாப்பு கவுன்சிலில் தடைவிதிக்கும் அல்கொய்தா தடை விதிக்கும் குழுவுக்கு கடைசி நேரம் எந்த உறுப்பு நாடும் எதிர்ப்புத் தெரிவிக்காமல் இருந்திருந்தால், மசூத் அசார் சர்வதேச தீவிரவாதியாக அறிவிக்கப்பட்டு, அனைத்து நாடுகளிலும் தேடப்படும் குற்றவாளியாக அறிவிக்கப்பட்டிருப்பார் என்பது குறிப்பிடத்தக்கது.