கூட்டணி அதிகாரப்பூர்வ அறிவிப்பு கவுண்டவுன் துவங்கியது- அமைச்சர் ஜெயக்குமார் பேட்டி

பதிவு செய்த நாள் : 19 பிப்ரவரி 2019 12:42

சென்னை:

நாடாளுமன்றத் தேர்தல் கூட்டணி கவுண்டவுன் துவங்கியது எனவும் 48 மணி நேரத்தில் அதிமுக கூட்டணி குறித்த அறிவிப்பு வெளியாகும் எனவும் அமைச்சர் ஜெயக்குமார் தெரிவித்துள்ளார்.

தமிழ் தாத்தா என்று அழைக்கப்படும் டாக்டர் உ.வே.சாமிநாதய்யரின். 165-வது பிறந்த நாளையொட்டி சென்னை மாநில கல்லூரியில் உள்ள அவரது சிலைக்கு அமைச்சர்கள் டி. ஜெயக்குமார், பா. பென்ஜமின், மா.பா. பாண்டியராஜன் உள்ளிட்டவர்கள் மலர்தூவி அஞ்சலி செலுத்தினர்.

அமைச்சர் ஜெயக்குமார் செய்தியாளர்கள் சந்திப்பில் கூறியதாவது:

நாடாளுமன்ற தேர்தல் கூட்டணிக்கான கவுண்டவுன் துவங்கியது. 48 மணி நேரத்தில் அ.தி.மு.க. கூட்டணி குறித்த அறிவிப்பு வெளியாகும்.

கூட்டணி குறித்த பேச்சு வார்த்தையை வெளிப்படையாக எப்படி கூற முடியும். கூட்டணி விவகாரத்தில் அ.தி.மு.க. தெளிவாக உள்ளது. கூட்டணி பேச்சுவார்த்தையில் தாமதம் எதுவும் இல்லை.

கூட்டணி விஷயத்தில் நாங்கள் எக்ஸ்பிரஸ்ரயில் வேகத்தில் சென்று கொண்டிருக்கிறோம், திமுக சரக்குரயில் வேகத்தில் சென்றுகொண்டிருக்கிறது

ஸ்டெர்லைட் ஆலையை மூட வேண்டும் என்று அரசு ஏற்கனவே எடுத்த முடிவு சரியானது. அரசாணை வெளியிட்டது கொள்கை முடிவுதான். ஸ்டெர்லைட் ஆலை எந்த காரணத்தை கொண்டும் மீண்டும் செயல்படாது.

தி.மு.க. தலைவர்  ஸ்டாலின் வாய் புளித்ததோ, மாங்காய் புளித்ததோ என்று உளறி வருகிறார்.

இவ்வாறு, அமைச்சர் ஜெயக்குமார் செய்தியாளர்கள் சந்திப்பில்  கூறினார்.