சிதம்பரம் நடராஜர் கோயிலில் ஆருத்ரா தரிசன விழா, ஆயிரக்கணக்கான பக்தர்கள் சாமி தரிசனம்

பதிவு செய்த நாள் : 23 டிசம்பர் 2018 14:09

சிதம்பரம்,

சிதம்பரம் நடராஜர் கோயிலில் ஆருத்ரா தரிசன விழா (23.12.2018) இன்று கோலாகலமாக நடைபெற்றது. இதில் ஆயிரக்கணக்கான பக்தர்கள் கலந்து கொண்டு சாமி தரிசனம் செய்தனர்.

திருவாரூர் – தியாகராஜர், சேலம் – சுகவனேஸ்வரர், திருப்பூர் – அவிநாசி லிங்கேஸ்வரர், திருவண்ணாமலை – அண்ணாமலையார், திருக்கோவிலூர் - வீரட்டானேஸ்வரர், தஞ்சாவூர், கும்பகோணம், குற்றாலம், நெல்லையப்பர் ஆகிய கோவில்களிலும் பக்தர்கள் அரோகரா மஹாதேவா கோஷம் எழுப்பி ஆருத்ரா தரிசனம் செய்தனர்.

ஆருத்ரா தரிசனம்
உலகப் புகழ்பெற்ற நடராஜர் கோயில் கடலூர் மாவட்டம் சிதம்பரத்தில் உள்ளது. பஞ்ச பூத தலங்களில் ஆகாய தலமான இக்கோயிலில் ஆண்டுதோறும் 6 மகா அபிஷேகங்கள் நடைபெறுவது வழக்கம். இதில் ஆனி மாதத்தில் ஆனித் திருமஞ்சன விழாவும், மார்கழி மாதத்தில் ஆருத்ரா தரிசன விழாவும் வெகுவிமரிசையாக நடைபெறும்.
தமிழ் மாதங்களில் மார்கழி மாதத்தில் வரும் திருவாதிரை நட்சத்திரம் சிவனுக்குரிய நட்சத்திரமாகும்.

அந்த நாள் சிவபெருமான் நடராஜராக ஆனந்த நடனம் புரியும் நன்னாளாகும். அந்த நாளில் நடராஜர் நடனம் புரிந்தபடி பக்தர்களுக்கு காட்சி கொடுப்பார். ஆனித்திருமஞ்சனம் மற்றும் ஆருத்ரா தரிசன விழாக்களின்போது மூலவராகிய நடராஜ மூர்த்தியே, உற்சவராக புறப்பட்டு பக்தர்களுக்கு அருள்பாலிப்பது சிறப்பு வாய்ந்த ஒன்றாகும்.

இத்தகைய சிறப்பு மிக்க ஆருத்ரா தரிசன விழா 12 நாட்கள் நடைபெறுவது வழக்கம். அதன்படி இந்த ஆண்டுக்கான விழா கடந்த 14-ம் தேதி கொடியேற்றத்துடன் தொடங்கியது. தொடர்ந்து விநாயகர், சுப்பிரமணியர், நடராஜர், சிவகாமசுந்தரி அம்பாள், சண்டிகேஸ்வரர் உள்ளிட்ட பஞ்சமூர்த்திகளுக்கு தினமும் சிறப்பு அபிஷேகமும், பூஜையும் மற்றும் வெவ்வேறு வாகனங்களில் வீதி உலா காட்சியும் நடந்தது.

9-வது நாள் விழாவான நேற்று சிதம்பரத்தில் தேரோட்டம் வெகு விமரிசையாக நடந்தது.

சிகர நிகழ்ச்சியும், 10-ம் நாள் திருவிழாவுமான ஆருத்ரா தரிசனம் இன்று (ஞாயிற்றுக்கிழமை) நடந்தது. அதிகாலையில் ஆயிரங்கால் முகப்பு மண்டபத்தில் சிவகாமசுந்தரி அம்பாளுக்கும், நடராஜருக்கும் மகாஅபிஷேகம் நடைபெற்றது.

பின்னர் சித்சபையில் ரகசிய பூஜை, பஞ்சமூர்த்திகள் வீதிஉலா காட்சி நடந்து, மதியம் 2 மணிக்கு மேல் ஆருத்ரா தரிசனம் நடைபெற்றது.

நாளை திங்கட்கிழமை (24.12.2018) பஞ்சமூர்த்திகள் முத்துப் பல்லக்கில் வீதிஉலா காட்சியும்,

நாளை மறுநாள் (செவ்வாய்க்கிழமை) தெப்ப உற்சவமும் நடைபெற இருக்கிறது. இதற்கான ஏற்பாடுகளை பொதுதீட்சிதர்கள் செய்து வருகின்றனர்.