அந்த கதாபாத்திரம்தான் முழு படம்! – -இயக்குனர் பாலாஜி தரணிதரன்

11 டிசம்பர் 2018, 03:55 PM

‘நடுவுல கொஞ்சம் பக்கத்த காணோம்’ படத்துக்கு பிறகு ‘சீதக்காதி’யுடன் களமிறங்கியுள்ளார் இயக்குனர் பாலாஜி தரணிதரன். விஜய் சேதுபதியின் கெட்டப் மூலமே எதிர்பார்ப்பை உருவாக்கி இருக்கும் அவரிடம் பேசியதிலிருந்து...

* 'சீதக்காதி' தலைப்பே வித்தியாசமாக இருக்கிறதே?

செத்தும் கொடுத்தான் 'சீதக்காதி' என்ற ஒரு பழமொழி இருக்கிறது. அதிலிருந்துதான் தலைப்பை எடுத்தேன். ஏன் இந்த தலைப்பு என்பது படம் பார்க்கும்போது புரியும்.

* 75 வயது கேரக்டரில் நடிக்க விஜய் சேதுபதி எப்படி ஒப்புக்கொண்டார்?

‘அய்யா’ கதாபாத்திரத்தை வைத்துத்தான் முழு படமே. படத்தில் 40 நிமிடங்கள் அக்கதாபாத்திரம் வரும். அதன் முக்கியத்துவம் விஜய் சேதுபதிக்குத் தெரிந்தது. என்ன சொல்லப் போகிறோம் என்பதை முழுமையாகப் புரிந்து கொண்டார். எனது 25-வது படம் இதுதான் என்று அறிவித்ததும் அவர்தான்.

* மற்ற நட்சத்திரங்கள்?

பாரதிராஜா, பாக்யராஜ் ஆகியோர் அவர்களாகவே வருவார்கள். இவர்கள் போக மகேந்திரன், மவுலி, அர்ச்சனா என நிறைய பேர் நடித்திருக்கிறார்கள்.

* விஜய் சேதுபதியின் மேக்கப் பற்றி?

எந்தவொரு விஷயத்தையுமே ரொம்ப கேஷுவலாகச் செய்துவிடுவார். அதுதான் விஜய் சேதுபதி. காலையில் மேக்கப் போட நாலரை மணி நேரமாகும். மாலையில் மேக்கப்பைக் கலைக்க 1 மணி நேரமாகும். மேக்கப்புக்குத் தகுந்தவாறு ஷூட்டிங்கை பிளான் பண்ணிக்குவேன். மேக்கப் போட்டவுடனே ஒரு புத்துணர்வு தெரியும். அப்போது குளோஸ் – அப் ஷாட்கள் எல்லாம் எடுத்து விடுவேன். ரொம்ப சந்தோஷமாகவே பண்ணினோம்.

* ‘நடுவுல கொஞ்சம் பக்கத்த காணோம்’ படத்துக்குப் பிறகு ஏன் இடைவெளி?

‘ஒரு பக்க கதை’ படம் எடுத்திருக்கோம். வெளியே வரணும். அப்படம் வெளியாகியிருந்தால் இந்த கேள்வியே வந்திருக்காது. ‘சீதக்காதி’ எனக்கு 3-வது படமாக இருந்திருக்கும். ‘நடுவுல கொஞ்சம் பக்கத்த காணோம்’ படத்தை முடித்தவுடன், எனக்கே ஒரு பிரேக் தேவைப்பட்டது. என் 2 வருட உழைப்பு அது. அப்படம் வெளியான 6 மாதங்களிலேயே ‘சீதக்காதி’ முதல் பாதி எழுதிவிட்டேன். ஆனால், தொடங்க முடி யாமல் ‘ஒரு பக்க கதை’ பண்ணினேன். தாமதமாகி விட்டது. சில நேரத்தில் எதுவும் நம் கையில் இல்லை.

* விஜய் சேதுபதியின் இந்த வளர்ச்சியை பற்றி?

‘நடுவுல கொஞ்சம் பக்கத்த காணோம்’ படத்துக்கு முன்பு ‘வர்ணம்’ என்ற படத்தில் சின்ன கேரக்டர் ரோலில் விஜய் சேதுபதி நடித்தார். அப்படத்தில் திரைக்கதை, வசனம் பகுதியில் பணிபுரிந்தேன். ‘96’ பிரேம்குமார் தான் அப்படத்துக்கு கேமராமேன். ’ஒரு நல்ல நாள் பாத்து சொல்றேன்’ இயக்குனர், ’அசுரவதம்’ இயக்குனர் எல்லாம் அதில் உதவி இயக்குனர்கள். அனைவருமே படப்பிடிப்பு முடிந்தவுடன் விஜய் சேதுபதியைப் பற்றிப் பேசுவார்கள். ‘நடுவுல கொஞ்சம் பக்கத்த காணோம்’ படத்தைப் பண்ணலாம் என்று முடிவு செய்தபோது, அனைவருமே விஜய் சேதுபதியின் பெயரை சிபாரிசு செய்தார்கள். விஜய் சேதுபதியை அழைத்துப் பேசினேன். அவர் நடந்து கொண்ட விதம், கதையை உள்வாங்கி என்ன பண்ண வேண்டும் எனக் கேட்டது என அனைத்துமே ரொம்ப ஈர்த்தது. நடித்தும் பிரமாதப்படுத்தினார். இந்த அளவுக்கு வளருவார் என்று எதிர்பார்க்கவில்லை. ஆனால், நல்ல நடிகராக வருவார் என்று எதிர்பார்த்தேன். அவருடைய இந்த வளர்ச்சிக்கு கடுமையான உழைப்புதான் காரணம். விஜய் சேதுபதி நடிக்க ஒப்புக் கொண்டால், இயக்குனருக்கு எவ்வித பிரச்னையுமே இருக்காது.