புதுச்சேரி எம்.எல்.ஏ.க்கள் நியமனம் முறையானதே: :உச்சநீதிமன்றம் தீர்ப்பு

பதிவு செய்த நாள் : 06 டிசம்பர் 2018 12:21

புதுடில்லி,

புதுச்சேரியில் 3 நியமன எம்.எல்.ஏ.க்கள் நியமனம் செய்தது செல்லும் என உச்சநீதிமன்றம் தீர்ப்பளித்துள்ளது.

புதுச்சேரியில் காங்கிரஸ் தலைமையிலான ஆட்சி நடந்து வருகிறது. சட்டசபைக்கு தேர்ந்தெடுக்கப்பட்ட 30 எம்.எல்.ஏ.க்கள் உள்ளனர். இவர்கள் தவிர மாநில அரசின் பரிந்துரையின் பேரில் மத்திய அரசு 3 பேரை எம்.எல்.ஏ.க்களாக நியமிக்கலாம்.

இந்நிலையில் புதுவை அரசின் பரிந்துரையின்றி பாரதீய ஜனதா கட்சியை சேர்ந்த சாமிநாதன், சங்கர், செல்வகணபதி ஆகியோரை நியமன எம்.எல்.ஏ.க்களாக மத்திய அரசு நியமித்தது.

இதற்கான உத்தரவு புதுவை அரசுக்கு கடந்த ஆண்டு ஜூலை மாதம் 3-ம் தேதி வந்தது. அவர்களுக்கு சபாநாயகர் வைத்திலிங்கம் பதவிப்பிரமாணம் செய்து வைக்காத நிலையில் புதுச்சேரி ஆளுநர் கிரண் பேடி மறுநாளே பதவிப்பிரமாணம் செய்து வைத்தார்.

மத்திய அரசின் இந்த நியமனத்துக்கு புதுச்சேரி அரசியல் கட்சிகள் சார்பில் பலத்த எதிர்ப்பு கிளம்பியது. நியமன எம்.எல்.ஏ.க்களை கடந்த ஆண்டு நடந்த சட்டமன்ற கூட்டத்தில் கலந்து கொள்ள அனுமதிக்க சபாநாயகர் வைத்திலிங்கம் மறுத்து விட்டார்.

இந்த நியமனத்தை எதிர்த்து சென்னை உயர்நீதிமன்றத்தில் முதல்வரின் நாடாளுமன்ற செயலாளர் லட்சுமி நாராயணன் எம்.எல்.ஏ. மற்றும் தனலட்சுமி என்பவரும் வழக்கு தொடர்ந்தனர். இந்த வழக்கினை விசாரித்த சென்னை உயர்நீதிமன்றம்  மத்திய அரசின் இந்த நியமனம் செல்லும் என்று உத்தரவிட்டது.

இதைத் தொடர்ந்து உயர்நீதிமன்ற உத்தரவுடன் கடந்த பிப்ரவரி மாதம் நடந்த சட்டமன்ற கூட்டத்தில் கலந்து கொள்ள நியமன எம்.எல். ஏ.க்கள் வந்தனர். ஆனால் சபாநாயகர் அவர்களை சட்டசபைக்குள் நுழைய அனுமதி மறுத்தார்.

இதற்கிடையே சென்னை உயர்நீதிமன்றத்தின் உத்தரவுக்கு தடை விதிக்கக்கோரி லட்சுமிநாராயணன் எம்.எல்.ஏ., தனலட்சுமி ஆகியோர் உச்சநீதிமன்றத்தில் வழக்கு தொடர்ந்தனர். இந்த வழக்கு கடந்த ஜூலை 13-ம் தேதி விசாரணைக்கு வந்தது.

சென்னை உயர்நீதிமன்றத்தின் உத்தரவுக்கு உச்சநீதிமன்றம் தடை எதுவும் பிறப்பிக்கவில்லை. எனவே, நியமன எம்.எல்.ஏ.க்களை சட்டசபைக்குள் சபாநாயகர் அனுமதிக்க வேண்டும் என்று கருத்து தெரிவித்தனர்.

இன்று இந்த வழக்கில் உச்சநீதிமன்றம் தீர்ப்பு வழங்கி உள்ளது. அதில் சென்னை உயர்நீதிமன்றத்தின் தீர்ப்பை உறுதி செய்துள்ளது.

புதுச்சேரி பாஜக நியமன எம்.எல்.ஏ.க்கள் 3 பேரை மத்திய அரசு நேரடியாக நியமித்தது செல்லும். நியமன எம்.எல்.ஏ.க்கள் விவகாரத்தில் புதுச்சேரி அரசு தலையிட தேவையில்லை என உச்சநீதிமன்றம் கூறி உள்ளது.