ஆன்மிக கோயில்கள்: கேட்டனவற்றைக் கொடுக்கும் தாய் பரமேக்காவு ஸ்ரீ பகவதி! – ஜே.வி.நாதன்

பதிவு செய்த நாள் : 04 நவம்பர் 2018



பெண்மைக்கு உயரிய மதிப்பினை அளித்துப் போற்றும் கேரள பூமியில், திரும்பிய பக்கமெல்லாம் பகவதி ஆலயங்கள்! இந்த பகவதி ஆலயங்களில் பெரியதும், சிறப்புடன் விளங்குவதும்  ‘பரமேக்காவு ஸ்ரீ பகவதி ஆலயம்’ என்று கூறுகிறார்கள். பெரியது மட்டுமல்ல, பழமையானதும் கூட; ஆயிரம் ஆண்டுகளுக்கு முற்பட்டது!

புராணத்தின்படி தேவியின் திருவுருவச் சிலை, புகழ்பெற்ற நாயர் குடும்பத்துத் தலைவருடன் இங்கு வந்ததாகக் கூறப்படுகிறது. ’திருமதம்குன்னு’ கோயிலில் (திருச்சூரிலிருந்து 80 கி.மீ. தூரத்தில் உள்ள மலப்புறம் மாவட்டத்தில் இருக்கும் புகழ்பெற்ற சப்த மாதா கோயில்) இருந்து சிலையைக் குடை நிழலில் பாதுகாப்பாகக் கொண்டு வந்தார் நாயர் குடும்பங்களின் தலைவர்.

இவர் கொண்டு வந்த தேவி, முதலில் திருச்சூர் வடக்குநாதன் கோயிலில் பிரதிஷ்டை செய்யப்பட்டாள். பத்ரகாளிதான் இங்கு பகவதியாக இருக்கிறாள். ’உக்கிரமூர்த்தி’ என்பது அவள் இயல்பு காரணமாகக் கூறப்படும் பெயர். ஆனால், இங்கு பகவதி சாந்த வடிவில் காட்சியளிக்கிறாள். வடக்குநாதன் கோயிலில் இருந்து பின்னர் இப்போதுள்ள இடத்துக்குக் கொணர்ந்து மறு பிரதிஷ்டை செய்யப்பட்டாள்.

மத்திய கேரளாவின் புகழ்பெற்ற இந்த ஆலயம் திருச்சூரின் மத்தியில் உள்ள பிரபலமான ஸ்ரீவடக்குநாதன் கோயிலுக்குக் கிழக்கில் ஒரு பர்லாங்கு தொலைவில் அமைந்துள்ளது. உலகப் புகழ்பெற்ற திருச்சூர் ‘பூரம் திருவிழா’ வடக்குநாதன் ஆலய வளாகத்தில்தான் நடந்தேறுகிறது. இத் திருவிழாவில் பங்கேற்கும் பத்து ஆலயங்களில் முக்கியமானவை இரண்டு. ஒன்று திருவம்பாடி ஸ்ரீஉன்னிகிருஷ்ணன் கோயில், இன்னொன்று பரமேக்காவு ஸ்ரீ பகவதி கோயில்.

திருவம்பாடிக் கோயிலில் இருந்து ஸ்ரீஉன்னிக்கிருஷ்ணன் 15 யானைகளுடன் ஊர்வலமாகப் போய் வடக்குநாதன் ஆலய வளாகத்தில் காட்சி கொடுப்பதைப் போல, பரமேக்காவு பகவதியும் 15 யானைகளுடன், வாண வேடிக்கைகள், வாத்திய முழக்கங்களுடன் பூரம் திருவிழாவில் பங்கேற்று நடத்திக் கொடுத்துத் திரும்புவது கண் கொள்ளாக் காட்சி!

பரமேக்காவு பகவதி கோயிலுக்கு  மொத்தம் ஐந்து ஆண் யானைகள் சொந்தமாக உள்ளன. திருவிழா சமயத்தில் வேறு கோயில்கள், அல்லது யானை வளர்ப்பவர்களிடமிருந்து கூடுதலாகப் பத்து யானைகள் வாடகைக்குப் பெற்று மொத்தம் 15 யானைகளை (15 யானைகள் வரைதான் அனுமதி!) பரமேக்காவு பகவதி ஆலய சார்பில் ஊர்வலமாக வடக்குநாதன் கோயில் வளாகத்துக்குக் கொண்டு போகிறார்கள்.

பரமேக்காவு, திருவம்பாடி ஆலயங்கள் தவிர இன்னும் 8 சிறிய ஆலயங்கள் தங்கள் சார்பாக, பூரம் திருவிழாவில் தலா 3 முதல் 14 யானைகள் வரை பங்கேற்கச் செய்கின்றன.

நெய்த்தலக்காவு பகவதி, கரமுக்கு பகவதி, அய்யன் தோள் பகவதி, லல்லூர் பகவதி, சூரக்கோட்டுக் காவு பகவதி, செம்புக்காவு பகவதி, பாணா முக்கும்பள்ளி சாஸ்தா, கணிமங்கலம் சாஸ்தா ஆகியவையே பூரம் திருவிழாவில் பங்கேற்கும் ஏனைய சிறு ஆலயங்கள்! ஒரே இடத்தில் சுமார் 65 யானைகளுக்கு மேல் - அழகிய ஆபரணங்கள், அணிகலன்கள், வண்ணக் குடை சகிதம் ஊர்வலமாகச் சென்று, வடக்குநாதன் ஆலய வளாகத்தில் வரிசையாக நின்று அற்புதமாகக் காட்சி தரும் அழகைப் பார்ப்பதற்கென்று உலகெங்குமிருந்தும் பக்தர்கள் வந்து குவிவது வழக்கம்!

பூரம் திருவிழாவில் 200-க்கு மேற்பட்ட தாள வாத்தியங்கள் ஸ்ரீவடக்குநாதன் கோயில் வளாகத்தில் முழக்கப்படுவது, பக்தர்களை மெய்ம் மறக்கச் செய்யும் நிகழ்வு ஆகும்! விடியற்காலை தொடங்கி நான்கு மணி நேரத்துக்குக் குறையாமல் நடத்தப்படும் வாணவேடிக்கை, அதிர்வேட்டுகள் கண்களுக்கும் காதுகளுக்கும் அற்புத விருந்து!

ஆலய நிர்வாகத்தினரைச் சந்தித்தோம். ‘பரமேக்காவு ஆலயம் காலை 4 மணிக்குத் திறக்கப்பட்டு 11 மணிக்கு நடை சாத்துகிறோம்.. மாலை 4 மணிக்கு மீண்டும் திறந்து இரவு 8 மணிக்கு மூடுகிறோம்..

தேவிக்குப் பல திருவிழாக்கள் இருந்தாலும் ‘வேலா திருவிழா’தான் மிக முக்கியமாகக் கொண்டாடப்படுகிறது. இது ஜனவரி முதல் வாரம் தொடங்கி 41 தினங்கள் நடக்கும். மீன ராசியில், ரோகிணி நட்சத்திரத்தில் பகவதியின் பிறந்த தினம் விழாவாகக் கொண்டாடப்படுகிறது. நவராத்திரித் திருவிழாவும் சிறப்பாக நடக்கும்.

பகவதிக்குத் தினம் சிறப்பு பூஜை உண்டு. தினமும் வெளிச்சப்பாடு, ஆவேசத்துடன் பக்தர்களுக்கு நல்லது, கெட்டதை முன்னதாக அனுமானித்து ‘குறி’ சொல்லுவார். அதை கேட்கக் கூட்டமாக மக்கள் வந்து ‘வெளிச்சப்பாடு’வின் குறிகளைக் கேட்பதில் ஆர்வம் காட்டுகிறார்கள்.

ஆலயம் சார்பாக ஒரு கல்லூரி மற்றும் கே.ஜி. முதல் பிளஸ் 2 வரை வகுப்புகள் கொண்ட சி.பி.எஸ்.சி. பள்ளி ஆகியவை நடத்தப்படுகின்றன. சுமார் 200 பேர் பயிலும் ஜோதிடப்பள்ளி ஒன்றும் ஆலய சார்பில் நடந்து வருகின்றது. செண்டை முதலான கேரள பாரம்பரிய வாத்தியங்கள் வாசிக்கச் சொல்லிக் கொடுக்கும் பள்ளியில் 150 முதல் 200 பேர் சேர்ந்து வருடந்தோறும் பயின்று வருகிறார்கள். இவை தவிர, தகன மேடை ஒன்றையும் ஆலயம் சார்பில் நடத்தி வருகிறோம்!

பரமேக்காவு பகவதி கோயிலுக்கு வந்து பகவதியைத் தரிசனம் செய்யும் பக்தர்களுக்கு ஒரு தாயின் பரிவோடு அவர்கள் கேட்பனவற்றை அருளுவாள் பகவதி என்பது மக்களின் அழுத்தமான நம்பிக்கை!’’ - இவ்வாறு ஆலய நிர்வாகத் தலைவரும் செயலரும் நம்மிடம் தெரிவித்தார்கள்.

வெறும் ஆன்மிகம் பரப்புவது மட்டுமின்றி, சமுதாயம் சார்ந்த பணிகளையும் இந்த ஆலயம் செய்து வருவது பெருமைக்குரிய விஷயமாக அமைந்து, ஆலயத்தின் புகழை மேலோங்கச் செய்திருக்கிறது. ---

---* * *