ஏவுகணைத் தாக்குதலை தடுக்கும் கருவிகளை ரஷியாவிடம் இருந்து வாங்கியதற்கு இந்தியா மீதும் பொருளாதார தடைகளா?: அதிபர் டிரம்ப் பதில்

பதிவு செய்த நாள் : 11 அக்டோபர் 2018 17:34

வாஷிங்டன்

    ஏவுகணைத் தாக்குதலை தடுக்கும் எஸ் -400 கருவிகளை ரஷியாவிடம் இருந்து வாங்கியதற்காக  இந்தியா மீது பொருளாதாரத் தடைகள் விதிக்கப்படுமா என்ற கேள்விக்கு அமெரிக்க அதிபர் டொனால்ட் டிரம்ப் பதிலளித்துள்ளார்.

ரஷியாவுடன் எஸ்-400 ஏவுகணைகளை வாங்கும் திட்டத்தை இந்தியா கைவிடவில்லை என்றால், ரஷியாவிடம் ராணுவ தளவாடங்களை வாங்கும் நாடுகள் தடை செய்யப்பட்ட பட்டியலின் கீழ் இந்தியா சேர்க்கப்பட்டு தடை விதிக்கப்படும் என அமெரிக்கா அதிபர் டிரம்ப் எச்சரிக்கை விடுத்திருந்தார். மேலும் ரஷியாவிடம் இருந்து ஆயுதங்களை வாங்கும் நாடுகள் மீது பொருளாதார தடை விதிக்க வகை செய்யும் சட்ட மசோதாவும் அமெரிக்க நாடாளுமன்றத்தில் நிறைவேற்றப்பட்டது.
ஆனால், அமெரிக்காவின் மிரட்டலை பொருட்படுத்தமால் ரஷியாவுடன் ஒப்பந்தத்தை இறுதி செய்தது இந்தியா.

இதைத்தொடர்ந்து இந்திய - அமெரிக்க உறவில் விரிசல் ஏற்படும் சூழல் உருவானது. மேலும் அமெரிக்க அதிபர் டொனால்ட் டிரம்ப், இந்தியா மீது பொருளாதாரத் தடைகளை விதிக்க தயாராகி வருவதாக செய்திகள் வெளியாகின.

இந்நிலையில் நேற்று வெள்ளை மாளிகையில் ஓவல் அலுவலகத்தில் பத்திரிகையாளர்கள் சந்திப்பில் இந்தியா குறித்து அமெரிக்க அதிபர் டொனால்ட் டிரம்ப்பிடம் கேள்வி எழுப்பப்பட்டது.

இதற்கு டிரம்ப் பதிலளித்தார். "இந்தியா குறித்து முடிவு விரைவில் அறிவிக்கப்படும். நீங்கள் நினைப்பதற்கு முன்னதாகவே இந்தியா குறித்த முடிவை அறிவிப்பேன். இந்தியா அதை விரைவில் அறிந்துகொள்ளும்" என்று டிரம்ப் செய்தியாளர்களிடம் கூறினார்