பிரதமர் மோடி ஒரு ஊழல் பேர்வழி: ராகுல் காந்தி விமர்சனம்

பதிவு செய்த நாள் : 11 அக்டோபர் 2018 16:53

புதுடில்லி

ரபேல் போர் விமானக் கொள்முதல் ஒப்பந்தத்தில் பிரதமர் மோடியின் பங்கு குறித்து விசாரணை நடத்த வேண்டும் என்றும், அவர் ஒரு ஊழல்வாதி என்றும் காங்கிரஸ் தலைவர் ராகுல் காந்தி விமர்சித்துள்ளார்.

காங்கிரஸ் தலைமையிலான ஐக்கிய முற்போக்குக் கூட்டணி ஆட்சியில் பிரான்ஸின் டசால்ட் நிறுவனத்திடம் இருந்து 126 ரபேல் போர் விமானங்களை வாங்க ஒப்பந்தம் செய்யப்பட்டது. இந்த விமானம் ஒவ்வொன்றும் ரூ.526 கோடிக்கு வாங்க முடிவு செய்யப்பட்டது. ஆனால், பாஜக ஆட்சிக்கு வந்ததும் இந்த ஒப்பந்தத்தை ரத்து செய்துவிட்டு, முதல் கட்டமாக 36 ரஃபேல் போர் விமானங்களை ஒவ்வொன்றும் ரூ.1,670 கோடிக்கு வாங்க ஒப்பந்தம் செய்தது. இந்நிலையில், இந்த ரபேல் போர் விமானக் கொள்முதல் விவகாரத்தில் ஊழல் நடந்துள்ளதாக காங்கிரஸ் கட்சி தொடர்ந்து குற்றங்சாட்டி வருகிறது.

காங்கிரஸ் கட்சியின் குற்றச்சாட்டுக்கு வலுசேர்க்கும் வகையில் பிரான்ஸ் நாட்டின் முன்னாள் அதிபர் ஹோலாண்டேவும், மத்திய அரசு ரிலையன்ஸ் நிறுவனத்தைத் தவிர வேறு எந்த நிறுவனத்தையும் தேர்வு செய்ய அதிகாரம் அளிக்கவில்லை என தெரிவித்தார். இதற்கு பாஜக அரசு மறுப்பு தெரிவித்தது.

இந்நிலையில், பிரான்ஸில் இருந்து வெளிவரும் புலனாய்வு பத்திரிகை மீடியாபார்ட் வெளியிட்ட செய்தியில், ரஃபேல் ஒப்பந்தத்தை உறுதி செய்யவேண்டுமெனில் ரிலையன்ஸ் நிறுவனத்தைப் பங்குதாரராகச் சேர்க்க வலியுறுத்தப்பட்டு இருந்தது என்று ஆவணத்தில் குறிப்பிடப்பட்டு இருந்தது என்று செய்தி வெளியிட்டது. இதை, டசால்ட் நிறுவனம் மறுத்துள்ளது.

இதற்கிடையே பிரான்ஸ் நாட்டுக்கு 3 நாட்கள் பயணம் மேற்கொண்ட மத்திய பாதுகாப்புத்துறை அமைச்சர் நிர்மலா சீதாரராமன், பிரதமர் மோடி ஆகியோரை காங்கிரஸ் தலைவர் ராகுல் காந்தி கடுமையாகச் சாடியுள்ளார்.

எதற்கு திடீர் பயணம்?

காங்கிரஸ் தலைவர் ராகுல் காந்தி டில்லியில் செய்தியாளர்களை சந்தித்துப் பேட்டியளித்தார். இதில் பேசிய அவர்,”ரபேல் போர் விமானத்தில் நடந்துள்ள ஊழல்களை மூடி மறைப்பதற்காகத்தான் மத்திய பாதுகாப்புத்துறை அமைச்சர் நிர்மலா சீதாராமன் பிரான்ஸ் நாட்டுக்குப் பயணம் மேற்கொண்டுள்ளார். இல்லாவிட்டால், பிரான்ஸ் நாட்டுக்கு பாதுகாப்புத்துறை அமைச்சர் திடீரென பயணம் செய்ய காரணம் என்ன?. அதற்கான அவசரம் என்ன இப்போது இருக்கிறது?” என்று சாடினார்.

பிரதமர் மோடி ஒரு ஊழல்வாதி

மேலும்,”ரபேல் போர் விமான ஒப்பந்தத்தில் பிரதமர் நரேந்திர மோடியின் பங்கு என்ன என்பது குறித்து விசாரணை நடத்த வேண்டும். 36 ரபேல் போர் விமானங்களை வாங்குவதில், அனில் அம்பானிக்கு ரூ.30 ஆயிரம் கோடி கிடைக்கப் பிரதமர் மோடி உதவியுள்ளார். இந்திய பிரதமர் நரேந்திர மோடி ஒரு ஊழல்வாதி” என்று கடுமையாக விமர்சித்துள்ளார்.

”உண்மையான நிலவரம் என்னவென்றால், நாட்டின் பிரதமர் ஊழல் செய்துள்ளார். ஆட்சிக்கு வரும்போது ஊழலை எதிர்த்துப் போரிடுவேன் என்று மோடி பேசினார், இன்று அவர் மீது ஊழல் குற்றச்சாட்டு இருப்பதால், நாட்டின் இளைஞர்களிடம் அவர் குறித்த விவரங்களையும், ஊழலில் ஈடுபட்டுள்ளதையும் நான் கூறுகிறேன்'' என்று ராகுல் காந்தி தெரிவித்துள்ளார்.