3ஆவது முறையாக பிரதமராக சட்ட திருத்தம்: ஜப்பான் பிரதமர் ஷின்சோ அபே முடிவு

பதிவு செய்த நாள் : 14 செப்டம்பர் 2018 17:55

டோக்கியோ

     2012ஆம் ஆண்டு முதல் ஜப்பான் பிரதமராக பதவி வகித்துவரும் ஷின்சோ அபே தொடர்ந்து மூன்றாவது முறையாக பிரதமராக, அரசியல் சாசனத்தில் திருத்தம் செய்ய உள்ளதாக தெரிவிக்கப்பட்டுள்ளது

ஷின்சோ அபே (வயது 63) கடந்த 2012ஆம் ஆண்டு முதல் ஜப்பான் பிரதமராக, பதவி வகித்து வருகிறார். முன்னதாக, 2009-10 ஆண்டில் அவர் பிரதமராக இருந்துள்ளார். தற்போது அவர் சார்ந்த ஆளும் லிபரல் ஜனநாயக கட்சி அந்நாட்டு பாராளுமன்றத்தில் மூன்றில் இரண்டு பங்கு பெரும்பான்மையுடன் உள்ளது. இந்நிலையில், மூன்றாவது முறையாகவும் பிரதமராக வேண்டும் என்று விருப்பப்பட்ட அபே, அதற்கான வேலைகளை தொடங்கியுள்ளார். வரும் செப்டம்பர் 20ஆம் தேதி கட்சியின் தலைவர் பதவிக்கு தேர்தல் நடைபெற உள்ளது.

இந்த தேர்தலில் அபேவின் போட்டியாளரும் முன்னாள் பாதுகாப்பு அமைச்சருமான ஷிகேரு இஷிபா களமிறங்கவுள்ளார்.  கட்சியில் 70 சதவிகித ஆதரவு அபேவுக்கு இருக்கும் காரணத்தால் அவர் எளிதாக வெற்றி பெருவார் என தெரிகிறது. அப்படி வெற்றி பெரும் பட்சத்தில், அந்நாட்டு அரசியல் சாசனத்தை திருத்தம் செய்து மூன்றாவது முறையாகவும் பிரதமராக பதவியேற்ப்பார் என தெரியவந்துள்ளது.

இன்று செய்தியாளர்களை சந்தித்துப் பேசிய பிரதமர் ஷின்சோ அபே, ”அரசியல் சாசனத்தில் திருத்தம் செய்யும் முயற்சிகளில் நான் ஈடுபட்டு வருகிறேன். யாரும் இதுவரை முன்னெடுக்காத இதை வெற்றிகரமாக செய்து புதிய சகாப்தத்தை உருவாக்குவேன்” என்று தெரிவித்தார்.