128 காவலர்கள், அதிகாரிகளுக்கு அண்ணா பதக்கம்: முதல்வர் பழனிசாமி உத்தரவு

பதிவு செய்த நாள் : 14 செப்டம்பர் 2018 16:54

சென்னை,

அண்ணா பிறந்த நாளையொட்டி, தமிழக காவல்துறை மற்றும் சீருடை அதிகாரிகள் / பணியாளர்கள் 128 பேருக்கு அண்ணா பதக்கங்கள் வழங்க தமிழக முதல்வர் எடப்பாடி கே. பழனிசாமி உத்தரவிட்டுள்ளார்.

தமிழ்நாட்டில் காவல் துறை, தீயணைப்பு மற்றும் மீட்புப் பணித்துறை, சிறைத் துறை, ஊர்க்காவல் படை மற்றும் தமிழ்நாடு விரல் ரேகைப் பிரிவு அலுவலர்கள் சிறப்பாகப் பணியாற்றியதை அங்கீகரிக்கும் வகையிலும் மற்றும் பணியில் ஈடுபாடு மற்றும் அர்ப்பணிப்புடன் பணிபுரிந்ததைப் பாராட்டும் வகையிலும், ஒவ்வொரு ஆண்டும் செப்டம்பர் 15-ம் நாள், பேரறிஞர் அண்ணா பிறந்த நாளன்று தமிழக முதல்வரின் பதக்கங்கள் அறிவிக்கப்பட்டு, வழங்கப்பட்டு வருகின்றன.
சட்டப் பேரவையில் காவல்துறை மானியக் கோரிக்கையின்போது,

முதலமைச்சர் அறிவித்ததையொட்டி தடய அறிவியல் துறை அறிஞர்களுக்கும் இந்தாண்டு முதல் இவ்விருது வழங்கப்படுகிறது,

இந்த ஆண்டு, காவல் துறையில் காவல் கண்காணிப்பாளர் முதல் முதல்நிலைக் காவலர் வரையிலான 100 அலுவலர்களுக்கும், தீயணைப்பு மற்றும் மீட்புப் பணித்துறையில் மாவட்ட அலுவலர் முதல் தீயணைப்பு வீரர் நிலை வரையிலான 10 அலுவலர்களுக்கும் பதக்கம் வழங்கப்படுகிறது.

சிறைத்துறையில் துணை சிறை அலுவலர் முதல் முதல்நிலை சிறைக்காவலர் வரையிலான 10 அலுவலர்களுக்கும், ஊர்க்காவல் படையில் மண்டல தளபதி முதல் பிரிவு தலைவர் வரையிலான 5 அலுவலர்களுக்கும் விரல்ரேகைப் பிரிவில் 2 கூடுதல் காவல் கண்காணிப்பாளர்களுக்கும் மற்றும் தடய அறிவியல் துறையில் 1 துணை இயக்குநருக்கும் ஆக மொத்தம் 128 பேருக்கு, அவர்களின் மெச்சத் தகுந்த பணியினை அங்கீகரிக்கும் வகையில் ‘முதல்வரின் அண்ணா பதக்கம்’ வழங்கப்படுகிறது.

பதக்கங்கள் பெறுகின்ற அலுவலர்களுக்கு அவரவர் தம் பதவிக்கேற்றவாறு, பதக்க விதிகளின்படி ஒட்டு மொத்த மானியத் தொகையும் வெண்கலப் பதக்கமும் அளிக்கப்படும்.

இந்தப் பதக்கங்கள் பின்னர் நடைபெறும் விழா ஒன்றில், பதக்கங்கள் அறிவிக்கப்பட்டுள்ளவர்களுக்கு முதலமைச்சர் வழங்குவார் என்று அரசுக் குறிப்பில் தெரிவிக்கப்பட்டுள்ளது.