விஜய் மல்லையா வெளிநாட்டுக்கு தப்பிச்சென்றதில் பிரதமருக்கு தொடர்பு: ராகுல் காந்தி சாடல்

பதிவு செய்த நாள் : 14 செப்டம்பர் 2018 16:23

புதுடில்லி

வங்கிகளில் கடன் பெற்று திருப்பிச் செலுத்தாமல் விஜய் மல்லையா வெளிநாட்டுக்கு தப்பிச் சென்றதில் பிரதமர் நரேந்திர மோடிக்கு தொடர்பு உள்ளதாக ராகுல் காந்தி இன்று விமர்சித்துள்ளார்.

பிரபல தொழிலதிபர் விஜய் மல்லையா பொதுத்துறை வங்கிகளில் ரூ.9,000 கோடி கடன் வாங்கி விட்டு அதை திருப்பி செலுத்தாமல் கடந்த 2016ஆம் ஆண்டு லண்டனுக்கு தப்பி சென்றுவிட்டார்.
அவரை கைது செய்து இந்தியாவுக்கு அழைத்துவர மத்திய அரசு மேற்கொண்ட முயற்சிக்கு உடனடியாக வெற்றி கிடைக்கவில்லை.
 இது தொடர்பான வழக்கு விசாரணை லண்டன் நீதிமன்றத்தில் உள்ளது.

வரும் டிசம்பர் 10ஆம் தேதி இது தொடர்பாக வழக்கில் இறுதி தீர்ப்பு வழங்கவுள்ளது. அப்போதுதான் மல்லையா இந்தியாவிடம் ஒப்படைக்கப்படுவாரா? இல்லையா என்பது குறித்து தெரியவரும்.

இதற்கிடையில், விஜய் மல்லையா தப்பிச்சென்றதற்கு சிபிஐ மெத்தனமாக இருந்ததும் ஒரு காரணமாகும் என்று பொதுவான குற்றச்சாட்டு எழுந்துள்ளது. மல்லையா கடன்களை திருப்பி கொடுக்கவில்லை என்ற குற்றச்சாட்டு எழுந்தபோது கடந்த 2015ஆம் ஆண்டு அக்டோபர் 16ஆம் தேதி அவருக்கு எதிராக “லுக்அவுட்” நோட்டீஸ் ஒன்றை சிபிஐ வெளியிட்டது.

அதில்,“மல்லையா வெளிநாட்டுக்கு செல்ல முயன்றால் கைது செய்ய வேண்டும்“ என்று சிபிஐ அறிவித்திருந்தது. அந்த லுக்அவுட் நோட்டீஸ் 2015ஆம் ஆண்டு நவம்பர் மாதம் 25ஆம் தேதி திருத்தம் செய்யப்பட்டது.

அந்த திருத்தத்தில் விஜய் மல்லையா வெளிநாடுகளுக்கு சென்று வரும் தகவல்களை கண்காணித்து செய்தியை சிபிஐக்கு தெரிவித்தால் போதும் என்று கூறப்பட்டு இருந்தது. இதன் மூலம் மல்லையாவை வெளிநாட்டுக்கு தப்பி செல்லவிடாமல் தடுக்கும் நடவடிக்கைகள் நீர்த்துப் போய்விட்டதாக குற்றச்சாட்டு எழுந்துள்ளது.

இந்நிலையில், விஜய் மல்லையா வெளிநாட்டுக்கு தப்பிச்சென்றதில் பிரதமர் மோடிக்கு தொடர்பு உள்ளதாக ராகுல் காந்தி இன்று குற்றம்சாட்டியுள்ளார். இதுதொடர்பாக, தனது டுவிட்டர் பக்கத்தில் அவர் இன்று வெளியிட்டுள்ள பதிவில்,

”லுக் அவுட் சுற்றறிக்கையில் கைது செய்யுங்கள் என்பதை தகவல் தெரிவியுங்கள் என திருத்தம் செய்து விஜய் மல்லையாவை சிபிஐ நேர்த்தியாக தப்பவிட்டுள்ளது. சிபிஐ நேரடியாக பிரதமருக்கு தகவல்களைத் தெரிவிக்கும் அதிகாரம் உள்ள அமைப்பாகும். அதேபோல பிரதமரும் சிபிஐக்கு நேரடியாக உத்தரவிடும் அதிகாரம் உள்ளவர்.  தெரிவித்துள்ளது.

பிரபலமான, சர்ச்சைக்குரிய வழக்கில் பிரதமர் ஒப்புதலைப் பெறாமல் சிபிஐ அறிவிப்பில் மாற்றம் செய்தது என்பது நம்பமுடியாத செயதியாகும்” என்று ராகுல் வன்மையாக சாடியுள்ளார்.

அனைத்து விவகாரங்களையும் பிரதமருக்கு நேரடியாக தெரிவிக்கும் சிபிஐ, இவ்வளவு பெரிய விவகாரத்தில் பிரதமரின் ஒப்புதல் இல்லாமல் லுக்அவுட் நோட்டீசில் திருத்தம் செய்தது என்பதை நம்புவதற்கில்லை என்று குறிப்பிட்டுள்ளார்.