ராஜிவ் காந்தி கொலையாளிகளை விடுவித்தால் நாட்டுக்கு ஆபத்தான முன்னுதாரணமாக அமையும்: மத்திய அரசு அறிவிப்பு

பதிவு செய்த நாள் : 10 ஆகஸ்ட் 2018 13:20

புதுடில்லி,

முன்னாள் பிரதமர் ராஜீவ் காந்தியை படுகொலை செய்த குற்றவாளிகளுக்கு விடுதலை அளித்தால் அது நாட்டுக்கு ஆபத்தான முன்னுதாரணமாக மாறிவிடும் என மத்திய அரசு இன்று உச்சநீதிமன்றத்தில் தெரிவித்தது.

கடந்த 1991-ம் ஆண்டு மே 21-ந் தேதி சென்னையை அடுத்த ஸ்ரீபெரும்புதூரில் நடைபெற்ற தேர்தல் பிரசார பொதுக்கூட்டத்தில் முன்னாள் பிரதமர் ராஜீவ்காந்தி படுகொலை செய்யப்பட்டார்.

அந்த வழக்கில் குற்றம்சாட்டப்பட்ட முருகன், சாந்தன், பேரறிவாளன், நளினி, ராபர்ட் பயஸ், ரவிச்சந்திரன், ஜெயக்குமார் ஆகிய 7 பேர் கைது செய்யப்பட்டு அவர்களுக்கு தண்டனை வழங்கப்பட்டது. முருகன், சாந்தன், பேரறிவாளன் ஆகிய 3 பேருக்கு தூக்கு தண்டனையும், நளினி உள்ளிட்ட மற்ற 4 பேருக்கு ஆயுள் தண்டனையும் விதிக்கப்பட்டது.

தூக்கு தண்டனை விதிக்கப்பட்ட 3 பேரும் ஜனாதிபதிக்கு கருணை மனு அனுப்பினார்கள். கடந்த 2014ம் ஆண்டு பிப்ரவரி மாதம் அவர்கள் அனுப்பிய கருணை மனுக்கள் மீது முடிவு எடுக்க காலதாமதம் ஏற்பட்டதாக கூறி, அவர்களுக்கு விதிக்கப்பட்ட தூக்கு தண்டனையை ஆயுள் தண்டனையாக குறைத்து உச்சநீதிமன்றம் உத்தரவிட்டது.

மேலும் இந்த 3 பேரையும் விடுதலை செய்வது குறித்து அரசு உரிய முடிவு எடுக்கலாம் என்றும் கூறியது.

அதைத்தொடர்ந்து முருகன், சாந்தன், பேரறிவாளன் மட்டுமின்றி இந்த வழக்கில் ஏற்கனவே 25 ஆண்டுகளாக ஆயுள் தண்டனை அனுபவித்து வரும் நளினி, ராபர்ட் பயஸ், ரவிச்சந்திரன், ஜெயக்குமார் ஆகியோரையும் சிறையில் இருந்து விடுதலை செய்யப்போவதாக தமிழக அரசு அறிவித்தது.

அப்போது மத்தியில் ஆட்சியில் இருந்த காங்கிரஸ் தலைமையிலான கூட்டணி அரசு, தமிழக அரசின் இந்த முடிவை எதிர்த்து உச்சநீதிமன்றத்தில்  ‘ரிட்’ மனு தாக்கல் செய்தது.

அந்த மனுவை விசாரணைக்கு ஏற்றுக்கொண்ட உச்சநீதிமன்றம் 7 பேரையும் விடுதலை செய்ய இடைக்கால தடை விதித்து உத்தரவிட்டது. அதன்பிறகு இந்த வழக்கை விசாரிக்க அமைக்கப்பட்ட அரசியல் சாசன அமர்வு பிறப்பித்த உத்தரவுக்கு எதிராக தமிழக அரசு மறுஆய்வு மனு ஒன்றை தாக்கல் செய்தது.

இதற்கிடையே, தாங்கள் 25 ஆண்டுகளுக்கும் மேலாக சிறையில் உள்ளதால் தங்களை விடுதலை செய்ய வேண்டும் என்று கோரி முருகன், சாந்தன், பேரறிவாளன் உள்ளிட்ட 7 பேரும் தமிழக அரசுக்கு கோரிக்கை மனு அளித்தனர்.

தன்னை விடுவிக்கும்படி தமிழக அரசுக்கு உத்தரவிடக்கோரி சென்னை உயர்நீதிமன்றத்தில் நளினி ஒரு மனு தாக்கல் செய்தார்.

அதை தொடர்ந்து அவர்களது கோரிக்கையை பரிசீலித்த தமிழக அரசு, அவர்களை விடுதலை செய்ய முடிவு செய்தது. அதற்கான அனுமதி கோரி தமிழக அரசு கடந்த 2016-ம் ஆண்டு மத்திய அரசுக்கு 2 கடிதங்கள் எழுதியது. ஆனால் அதற்கு மத்திய அரசு பதில் தரவில்லை.

இதற்கிடையே, தமிழக அரசு ஏற்கனவே தாக்கல் செய்திருந்த மறுஆய்வு மனு மீதான விசாரணையில், 7 குற்றவாளிகளையும் விடுவிப்பது குறித்து 3 மாதங்களுக்குள் மத்திய அரசு தன் கருத்தை தெரிவிக்க வேண்டும் என்று கடந்த ஜனவரி மாதம் 23-ந் தேதி உச்சநீதிமன்றம் உத்தரவிட்டது.

அதை தொடர்ந்து ராஜீவ்காந்தி கொலை வழக்கு கைதிகள் தொடர்பாக மத்திய அரசு கேட்ட விவரங்கள் மற்றும் ஆவணங்களை தமிழக அரசு அனுப்பி வைத்தது. அதை பரிசீலித்த மத்திய உள்துறை அமைச்சகம் கடந்த ஏப்ரல் 18ஆம் தேதி மத்திய எழுதிய கடிதத்தில் ராஜீவ் கொலை குற்றவாளிகள் 7 பேரை விடுதலை செய்ய கூடாது என கூறி உள்ளது.

இவர்கள் 7 பேரையும் விடுவிக்க வேண்டும் என்ற தமிழக அரசு அனுப்பிய மனுவை ஜனாதிபதியும் நிராகரித்தார்.

இந்நிலையில் உச்சநீதிமன்ற நீதிபதிகள் ரஞ்சன் கோகோய், நவின் சின்ஹா மற்றும் கே.எம். ஜோசப் ஆகியோர் அடங்கிய அமர்வு முன்னிலையில் இன்று இந்த வழக்கின் விசாரணை நடைபெற்றது.

அப்போது ராஜீவ் கொலை குற்றவாளிகளை விடுவிக்க மத்திய அரசு தரப்பில் எதிர்ப்பு தெரிவிக்கப்பட்டது. ‘‘அவர்களை விடுவித்தால் சர்வதேச அளவில் ஆபத்தான முன்னுதாரணமாக ஆகிவிடும். எனவே அவர்களை விடுதலை செய்யக்கூடாது’’ என மத்திய அரசு தெரிவித்தது.

இறுதியில் ராஜீவ் கொலையாளிகள் குறித்து மத்திய உள்துறை அமைச்சகம் தாக்கல் செய்த ஆவணத்தை ஏற்றுக்கொண்ட நீதிபதிகள் வழக்கு விசாரணையை ஒத்திவைத்தனர்.