அணு ஆயுத திட்டங்களை முழுமையாக கைவிட வலியுறுத்தினால் டிரம்ப் உடனான பேச்சுவார்த்தை ரத்து: வடகொரியா மிரட்டல்

பதிவு செய்த நாள் : 16 மே 2018 19:17

பியோங்யாங்:

அணு ஆயுத திட்டத்தை முழுமையாக கைவிட அமெரிக்கா வலியுறுத்தினால் டிரம்ப் உடன் நடைபெற இருக்கும் பேச்சுவார்த்தையை ரத்து செய்துவிடுவதாக வட கொரியா மிரட்டல் விடுத்துள்ளது.

அணு ஆயுத பரிசோதனைகள், ஏவுகணை சோதனைகளால் தொடர்ந்து சர்வதேச நாடுகளை மிரட்டி வந்த வடகொரிய தலைவர் கிம் ஜாங் உன், தற்போது மற்ற நாடுகளுடன் இணக்கத்துடன் இருக்க விரும்புகிறார்.
இனி அணு ஆயுத சோதனைகள் எதுவும் நடத்தமாட்டோம் என்று அறிவித்த அவர் கடந்த மாதம் தென் கொரியா அதிபர் மூன் ஜே இன் உடன் பேச்சு வார்த்தை நடத்தினார்.
இந்த வரலாற்று சிறப்பு மிக்க பேச்சுவார்த்தை உலக நாடுகளிடையே வரவேற்பை பெற்றது.

இந்நிலையில், அமெரிக்க அதிபர் டிரம்ப் உடன் பேச்சுவார்த்தை நடத்த கிம் முடிவு செய்தார். இந்த சந்திப்பு ஜூன் 12 ஆம் தேதி சிங்கப்பூரில் நடைபெறும் என அறிவிக்கப்பட்டுள்ளது.

இந்த சூழலில், தென் கொரியாவில் நடைபெறும் அமெரிக்க - தென்கொரியா ராணுவ ஒத்திகை வடகொரியாவை ஆத்திரம் அடையச் செய்துள்ளது. இதையடுத்து தென் கொரியா உடன் இன்று நடைபெற இருந்த உயர்மட்ட பேச்சுவார்த்தையை வடகொரியா ரத்து செய்துள்ளது.

அமெரிக்கா மற்றும் தென் கொரியா இணைந்து மேற்கொண்ட ராணுவ பயிற்சி வடகொரியா உடனான உறவுக்கு பாதிப்பு ஏற்படுத்தும் வகையில் இருப்பதாக கூறி பேச்சுவார்த்தையை வடகொரியா ரத்து செய்துள்ளது.

மேலும், அணு ஆயுத திட்டங்களை முழுமையாக கைவிட அமெரிக்க வலியுறுத்தினால் சிங்கப்பூரில் ஜூன் 12 ஆம் தேதி நடக்கவிருக்கும் டொனால்ட் டிரம்ப் - கிம் ஜாங் உன் இடையிலான பேச்சுவார்த்தை ரத்து செய்யப்படும் என வடகொரியா எச்சரித்துள்ளது. மேலும் அமெரிக்காவுடன் பொருளாதார உறவு வைத்துக்கொள்ள மாட்டோம் என்றும் மிரட்டல் விடுத்துள்ளது. 

இது குறித்து வடகொரிய அரசு செய்தி நிறுவனம் வெளியிட்டுள்ள அறிவிப்பில்,

அணு ஆயுத திட்டங்களைக் கைவிட்டால் அமெரிக்கா உரிய இழப்பீடு கொடுக்க முன்வந்திருப்பதை ஏற்கமாட்டோம். எங்களது பொருளாதார மேம்பாட்டிற்கு அமெரிக்காவின் எந்த உதவியையும் நாங்கள் எதிர்பார்க்கவில்லை எனத் தெரிவிக்கப்பட்டுள்ளது.

இந்த விவகாரத்தில் வடகொரியாவின் நிலைப்பாட்டைக் கவனித்து வருவதாகவும், தங்கள் கூட்டு நாடுகளுடனான நெருக்கம் தொடரும் என்றும் வெள்ளை மாளிகை செய்திப்பிரிவு செயலாளர் தெரிவித்துள்ளார்.