12ஆம் வகுப்பு பொதுத்தேர்வு முடிவுகள் வெளியீடு: 91.1 சதவீத மாணவ மாணவிகள் தேர்ச்சி

பதிவு செய்த நாள் : 16 மே 2018 10:41

சென்னை

12 ஆம் வகுப்பு பொதுத்தேர்வு முடிவுகள் இன்று வெளியிடப்பட்டன. இதில் இந்த ஆண்டு, 91 சதவீத மாணவ மாணவிகள் தேர்சிபெற்றுள்ளனர்.

தமிழ்நாட்டில் 12 ஆம் வகுப்பு பொதுத்தேர்வு மார்ச் 1ஆம் தேதி தொடங்கி ஏப்ரல் 6ஆம் தேதி முடிவடைந்தது. தமிழ்நாடு மற்றும் புதுச்சேரியில் இருந்து 6 ஆயிரத்து 903 பள்ளிகளில் இருந்து 8,66,934 மாணவ மாணவிகள் தேர்வு எழுதினார்கள்.

மாணவிகள் 4,63,758 பேரும் மாணவர்கள் 4,30,176 பேரும் இந்த தேர்வை எழுதினர். வழக்கம் போல மாணவிகள் தான் அதிகம். தனி தேர்வர்கள் 40,686 பேர். அனைத்து மாணவர்களும் தேர்வு எழுத தமிழ்நாடு மற்றும் புதுச்சேரியில் 2,942 மையங்கள் அமைக்கப்பட்டிருந்தன.

விடைத்தாள் திருத்தும் பணி முடிவடைந்து, மதிப்பெண்கள் கம்ப்யூட்டர் மூலம் சான்றிதழில் பதிவு செய்யும் பணி நடந்தது. மீண்டும் மதிப்பெண்களை சரிபார்க்கும் பணி நடைபெற்றது. அனைத்து பணிகளும் முடிவடைந்த நிலையில், இன்று அதன் முடிவுகள் அறிவிக்கப்பட்டன.

முடிவுகள் வெளியீடு

12 ஆம் வகுப்பு பொதுத்தேர்வு முடிவுகளை அரசு பொதுத்தேர்வுகளின் இயக்குநர் தண்.வசுந்தராதேவி வெளியிட்டார். முன்னதாக செய்தியாளர்களை சந்தித்த பள்ளி கல்வித்துறை அமைச்சர் செங்கோட்டையன், மாணவ மாணவிகளின் தேர்ச்சி விகிதம் பற்றிய தகவல்களை வெளியிட்டார்.

தேர்சி விகிதம்

இதில் பேசிய அவர், தமிழகம், புதுவையில் 12ஆம் வகுப்பு பொதுத்தேர்வில் 91.1 சதவீத மாணவ மாணவிகள் தேர்ச்சியடைந்துள்ளனர். கடந்த ஆண்டை விட ஒரு சதவீதம் தேர்ச்சி விகிதம் குறைந்துள்ளது. மாணவிகள் 94.1 சதவீதம், மாணவர்கள் 87.7 சதவீதம் பேர் தேர்ச்சி பெற்றுள்ளனர். இந்த ஆண்டும் மாணவிகளே அதிக அளவில் தேர்ச்சிபெற்றுள்ளதாக தெரிவித்தார்.

97 சதவீத தேர்ச்சி விகிதத்துடன் விருதுநகர் மாவட்டம் முதலிடம் பிடித்துள்ளது. 96.3 சதவீத தேர்ச்சி விகிதத்துடன் ஈரோடு மாவட்டம் இரண்டாம் இடத்தையும், 96.1 சதவீத தேர்ச்சி விகிதத்துடன் திருப்பூர் மாவட்டம் மூன்றாவது இடம் பிடித்துள்ளது. 1907 பள்ளிகள் 100 சதவீத தேர்ச்சி பெற்றுள்ளன.

மறுதேர்வு

12 ஆம் வகுப்பு பொதுத்தேர்வில் தோல்வியடைந்த மற்றும் தேர்வுக்கு வர இயலாத மாணவர்கள், வரும் ஜூன் 25ஆம் தேதி மறுதேர்வு எழுதலாம். தனியார் பள்ளிகளில் சிறந்த மாணவர்களின் புகைப்படங்களை விளம்பரங்களாக வெளியிடக்கூடாது. மீறும் தனியார் பள்ளிகள் மீது சட்டப்படி தகுந்த நடவடிக்கை எடுக்கப்படும் என்று அமைச்சர் செங்கோட்டையன் தெரிவித்தார்.

தேர்வு முடிவுகளை ஒவ்வொரு மாவட்டத்திலும் உள்ள மாவட்ட ஆட்சியர் அலுவலகங்களில் உள்ள தேசிய தகவலியல் மையங்களிலும் அனைத்து மைய மற்றும் கிளை நூலகங்களிலும் அறிந்துகொள்ளலாம். பள்ளி மாணவர்கள் தாங்கள் பயின்ற பள்ளிகளிலும் மதிப்பெண்களுடன் கூடிய தேர்வு முடிவுகளை அறிந்துகொள்ளலாம்.

மொபைலுக்கு குறுஞ்செய்தி

பள்ளி மாணவர்களுக்கு அவர்கள் பயின்ற பள்ளிகளில் சமர்ப்பித்த உறுதிமொழிப் படிவத்தில் குறிப்பிட்டுள்ள கைப்பேசி எண்ணுக்கு குறுஞ்செய்தி மூலம் தேர்வு முடிவுகள் அனுப்பிவைக்கப்பட்டுள்ளது. தனித்தேர்வர்களுக்கும், ஆன்லைனில் விண்ணப்பிக்கும்போது வழங்கிய கைப்பேசி எண்ணிற்கு தேர்வு முடிவுகள் குறுஞ்செய்தியாக அனுப்பப்பட்டுள்ளது.

கடந்த ஆண்டைப் போலவே இந்த ஆண்டும் ரேங்க் பட்டியல் வெளியிடப்படவில்லை என்பது குறிப்படத்தக்கது

தேர்வு முடிவுகளை www.tnresults.nic.in, www.dge1.tn.nic.in, ww.dge2.tn.nic.in ஆகிய இணைய தளங்களில் மாணவர்கள் அறிந்துகொள்ளலாம்.


மேல்நிலை இரண்டாமாண்டு பொதுத்தேர்வு, முடிவு குறித்து
அரசுத் தேர்வுகள் இயக்ககம், சென்னை - 600006, வெளியிட்டுள்ள அறிக்கையைக் காண இங்கே சொடுக்கவும்

https://drive.google.com/open?id=1-mWi_a0dRsbJ5TVLOEJd2cp-Lwj30OGY