மாணவிகளை பாலியல் தொழிலுக்கு அழைத்த பேராசிரியை நிர்மலா தேவி கைது : விசாரணை குழு அமைத்தார் ஆளுநர்

பதிவு செய்த நாள் : 16 ஏப்ரல் 2018 15:43

சென்னை,

    மாணவிகளை பாலியல் தொழிலுக்கு அழைத்ததாக குற்றம்சாட்டப்பட்ட  தேவாங்கூர் கல்லூரியின் கணித பேராசிரியை  நிர்மலா தேவியை  இன்று காவல்துறையினர் கைது செய்தனர். இந்த விவகாரம் குறித்து உயர்மட்ட விசாரணை நடத்த  ஓய்வு பெற்ற ஐஏஎஸ் அதிகாரி தலைமையில் தனி குழு அமைத்தார் ஆளுநர் பன்வாரிலால் புரோகித். 

விருதுநகர் மாவட்டம், அருப்புக்கோட்டையில் தேவாங்கர் கலை அறிவியல் கல்லூரி பேராசிரியை நிர்மலா தேவி, உயர் பொறுப்பில் உள்ளவர்களிடம் மாணவிகள் அட்ஜெஸ்ட் செய்து கொண்டால், 85 சதவீத மதிப்பெண்களும், பணமும் தருவதாக கூறி நிர்பந்தப்படுத்தினார்.
ஆனால், மாணவிகள் தங்களுக்கு விருப்பம் இல்லை என்று கூறி விட்டனர். இந்த நிலையில் நிர்மலா தேவி, மாணவிகளிடம் பேசும் ஆடியோ வைரலாக பரவியது. இதனைத் தொடர்ந்து பேராசிரியை நிர்மலா தேவியை கல்லூரி நிர்வாகம் பணி நீக்கம் செய்தது.
ஆடியோவில் பேசியது நான் தான் என்றும், தான் பேசியதை மாணவர்கள் தவறாக புரிந்து கொண்டுள்ளனர் என்றும் பேராசிரியை நிர்மலா தேவி கூறியுள்ளார்.

மாணவிகளை தவறான வழியில் கொண்டு செல்லும் வகையில் பேசிய பேராசிரியை நிர்மலா தேவி மீது நடவடிக்கை எடுக்கப்படும் என்று தமிழக அமைச்சர் ஜெயக்குமார் கூறினார்.

இந்த நிலையில், மாணவிகளை அட்ஜெஸ்ட் செய்து கொள்ளுமாறு பேராசிரியை பேசியது குறித்து விசாரணை நடத்த வேண்டும் என்று மதுரை கல்லூரி முன்னாள் முதல்வர் முரளி, தமிழக ஆளுநருக்கு வலியுறுத்தியுள்ளார். இந்த விவகாரத்தில், உயர்கல்வித் துறை அமைச்சர் தலையிட்டு நடவடிக்கை எடுக்க வேண்டும் என்றும் முரளி கோரிக்கை விடுத்துள்ளார்.

பேராசிரியை நிர்மலா தேவியின் செல்போன் பேச்சு குறித்து சம்பந்தப்பட்ட மாணவிகள் கல்லூரி நிர்வாகத்திடம் புகார் அளித்தனர். இதன் பேரில் விசாரணைக்குழு அமைக்கப்பட்டது. முதல் கட்ட விசாரணை முடிவடைந்த நிலையில்  நிர்மலாதேவி சஸ்பெண்டு செய்யப்பட்டுள்ளார்.

கல்லூரியின் செயலாளர் ராமசாமி இதுபற்றி கூறியதாவது:-

மாணவிகளிடம்  பாலியல்  வற்புறுத்தல் குறித்து 3 மூத்த பேராசிரியர்களை கொண்டு விசாரணை நடத்தப்பட்டது. அவர்கள் விசாரணை நடத்தி என்னிடம் அறிக்கை அளித்தனர். அதன் அடிப்படையில் நிர்மலா தேவி தற்காலிகமாக பணிநீக்கம் செய்யப்பட்டுள்ளார்.

குற்றச்சாட்டு குறித்து நிர்மலாதேவி பதில் அளிக்க கூறி உள்ளோம். பதில் கிடைத்தவுடன் கல்லூரி அளவில் விசாரணை கமிஷன் அமைக்கப்பட்டு சட்டப்பூர்வ நடவடிக்கை எடுக்கப்படும் என கல்லூரியின் செயலாளர் ராமசாமி உறுதி அளித்தார்.

பல்கலை கழகம் விசாரணை

மாணவிகளை தவறாக வழிநடத்த முயன்ற உதவிப் பேராசிரியை நிர்மலா தேவி குறித்து விசாரிக்க 5 பேர் கொண்ட குழு அமைத்து மதுரை காமராஜர் பல்கலைக்கழகம் உத்தரவிட்டுள்ளது.

பேராசிரியை நிர்மலாவை நிரந்தரமாக பணியில் இருந்து நீக்குவதுடன், அவரைக் கைது செய்ய வலியுறுத்தி மாதர் சங்கமும், இந்திய மாணவர் சங்கமும் இணைந்து கல்லூரி வாயில் முன் போராட்டத்தில் ஈடுபட்டுள்ளனர்.

மேலும் இச்சம்பவத்தில் தொடர்புடைய காமராஜர் பல்கலைக்கழக உயர் அதிகாரிகள் மீதும் நடவடிக்கை எடுக்க வேண்டும் என்று அவர்கள் வலியுறுத்தி முழக்கமிட்டு வருகின்றனர்.

பேராசிரியை நிர்மலாதேவி விவகாரம் அதிர்ச்சியானது; முழுமையாக விசாரணை நடத்தப்படவேண்டியது; விருதுநகர் எஸ்.பி. யிடம் உயர்கல்வித்துறை சார்பில் புகார் அளிக்கப்படும் என  உயர்கல்வித் துறை செயலாளர் சுனில்பாலிவால் கூறி உள்ளார்.

இந்த நிலையில் அருப்புக்கோட்டை டிஎஸ்பி தனபாலிடம் இந்த புகார் கொடுக்கப்பட்டுள்ளது. இந்த புகாரை கல்லூரி நிர்வாகமும் மாதர் சங்கமும் கொடுத்துள்ளது. புகார் மீது சட்டப்படியான நடவடிக்கை எடுக்கப்படும் என்று டி.எஸ்.பி. தனபால் கூறியுள்ளார்.

நிர்மலா தேவி கைது

பேராசிரியை நிர்மலா தேவியின் மீது அளிக்கப்பட்ட புகாரின் கீழ் இன்று அவர் காவல்துறையினரால் கைது செய்யப்பட்டார். அருப்புகோட்டை அருகே ஆத்திப்பட்டியில் உள்ள   நிர்மலா தேவியின் வீட்டிற்கு சென்ற காவல்துறையினர் பல முறை அழைத்தும் அவர் கதவை திறக்கவில்லை. அதனால் அவரது உறவினர்களின் உதவியுடன் கதவை உடைத்து சென்ற காவலர்கள் நிர்மலா தேவியை கைது செய்தனர்.

கைது செய்யப்பட்ட நிர்மலா தேவி மீது மூன்று பிரிவுகளில் வழக்கு பதிவு செய்யப்பட்டுள்ளது. 

ஆளுநர் தனிக்குழு அமைப்பு

மாணவிகளை பாலியல் தொழிலுக்கு அழைத்த நிர்மலா தேவி விவகாரத்தில் உயர்மட்ட விசாரணைக்கு தமிழக ஆளுநர் பன்வாரிலால் புரோகித் இன்று உத்தரவிட்டார். மேலும் இந்த வழக்கை விசாரிக்க ஓய்வு பெற்ற ஐஏஎஸ் அதிகாரி ஆர். சந்தானம் தலைமையில்  விசாரணை குழுவை அமைத்தார்  பன்வாரிலால் புரோகித். 

இந்த வழக்கில்  தொடர்புடைய எந்த குற்றவாளியும் தண்டனையில் இருந்து தப்பிக்க முடியாது  என ஆளுநர் பன்வாரிலால் புரோகித் தெரிவித்தார்.