ஏர்செல் மேக்சிஸ் வழக்கில் கார்த்தி சிதம்பரத்தை கைது செய்ய தடை நீட்டிப்பு

பதிவு செய்த நாள் : 16 ஏப்ரல் 2018 13:26

புதுடில்லி

    ஏர்செல் மேக்சிஸ் மோசடி தொடர்பாக சிபிஐ மற்றும் அமலாக்கத்துறை தொடர்ந்த 2 வழக்குகளை விசாரித்த டில்லி நீதிமன்றம் கார்த்தி சிதம்பரத்தை கைது செய்வதற்கான தடையை வரும் மே 2 ஆம் தேதி வரை நீட்டித்து உத்தரவிட்டுள்ளது.


கார்த்தி சிதம்பரத்திற்கு ஏர்செல் மேக்சிஸ் மோசடி வழக்கில் தொடர்பு இருப்பதற்கு தங்களிடம் ஆதாரங்கள் இருப்பதாக பண மோசடி தடுப்புச் சட்ட ஆணையம் அறிக்கை வெளியிட்டது. இதையடுத்து அவரை சிபிஐ மற்றும் அமலாக்கத்துறை அதிகாரிகள் கைது செய்யலாம் என எதிர்ப்பார்க்கப்பட்டது.

இதைத்தொடர்ந்து, டில்லி சிபிஐ சிறப்பு நீதிமன்றத்தில் கார்த்தி சிதம்பரம் முன்ஜாமீன் கோரி மனு தாக்கல் செய்தார். இந்த மனுவை கடந்த மார்ச் 24ஆம் தேதி விசாரித்த சிறப்பு நீதிபதி ஓ.பி.ஷைனி, கார்த்தி சிதம்பத்தை  ஏப்ரல் 16ஆம் தேதி வரை கைது செய்யக்கூடாது என்று உத்தரவிட்டிருந்தார்.

இந்நிலையில், தடை காலம் இன்று முடியவுள்ள நிலையில் இந்த வழக்கு இன்று மீண்டும் விசாரணைக்கு வந்தது. அப்போது, கார்த்தி சிதம்பரத்தை கைது செய்ய விதிக்கப்பட்ட தடையை வரும் மே 2ஆம் தேதி வரை நீட்டித்து சிறப்பு நீதிபதி ஓ.பி.ஷைனி உத்தரவிட்டார். வழக்கு விசாரணையும் அன்றைய தினத்திற்கு ஒத்திவைக்கப்படுவதாக அறிவித்தார்.

கார்த்தி சிதம்பரம் வழக்கு உச்சநீதிமன்றத்தில் வரும் ஏப்ரல் 27ஆம் தேதி விசாரணைக்கு வரவுள்ளதால் அவரை கைது செய்ய தடை நீட்டிக்கப்பட்டுள்ளது என்பது குறிப்பிடத்தக்கது.