ஸ்டெர்லைட் நிர்வாகம் பேசிய பணபேரம்: மத்திய அமைச்சர் பொன்.ராதாகிருஷ்ணன் அதிரடி புகார்

பதிவு செய்த நாள் : 16 ஏப்ரல் 2018 12:58

தூத்துக்குடி

ஸ்டெர்லைட் ஆலை நிர்வாகம் என்னிடம் பண பேரம் பேசியது. நான் அதனை மறுத்துவிட்டேன்.  இந்தப் பிரச்சினையில் இப்பொழுது மாநில அரசுதான் செயல்பட வேண்டும் என மத்திய இணை அமைச்சர் பொன்.ராதாகிருஷ்ணன் கூறினார்.

தூத்துக்குடியில் மத்திய இணை அமைச்சர்  பொன்.ராதாகிருஷ்ணன் செய்தியாளர்களுக்கு பேட்டி அளித்தார். அப்போது அவர் கூறியதாவது:

தமிழகத்தில் எந்த வளர்ச்சி திட்டமும் நடந்து விடாதபடி சதிச் செயல்கள் நடந்து வருகின்றன.

தூத்துக்குடி துறைமுகத்தில் ரூ.3 ஆயிரம் கோடியில் வளர்ச்சி பணிகள் நடைபெறுகிறது. இதுபோல கன்னியாகுமரியிலும் வளர்ச்சிப் பணிகள் நடக்கின்றன.

முதல் போராளி

தூத்துக்குடி ஸ்டெர்லைட் ஆலைக்கு எதிராக குருஸ் பர்னாந்து சிலை அருகே பாஜக  சார்பாக 4 நாள் உண்ணாவிரதம் இருந்து முதலில் போராடியவன் நான். அப்போது எனக்கு மக்கள் ஆதரவு அளிக்கவில்லை. அந்தக கம்பெனியால் வேலைவாய்ப்பு கிடைக்கும் என்று கூறி விட்டனர்.

ஆனால் இப்போது பாதிப்பு என்றதும் அதே மக்கள் போராடுகின்றனர். அந்த ஆலை செயல்படுவது குறித்து மாநில அரசு தான் முடிவெடுக்க வேண்டும். ஸ்டெர்லைட் ஆலையை தொடங்கியது அ.தி.மு.க., தி.மு.க. கட்சிகள்தான்.

நான் உண்ணாவிரதம் இருந்த போது ஸ்டெர்லைட் ஆலை நிர்வாகம் என்னிடம் பேரம் பேசியது. அதற்கு நான் உடன்படவில்லை. பின்னர் 1998 நாடாளுமன்ற தேர்தலில் தேர்தல் செலவுக்கு பணம் அளிக்க முன்வந்தனர். அதனையும் நான் நிராகரித்து திருப்பி அனுப்பினேன்.

இதுபோல கூடங்குளம் அணு உலைக்கு எதிராகவும் தொடக்கத்தில் நான் போராடினேன். ஆனால் பல கோடி பணம் செலவழித்துவிட்ட பின்னர் நிறுத்த முடியாது. திட்டம் வேண்டும் என்று அப்போது கூறி விட்டனர்.

எனவே எந்த திட்டத்தையும் அதனைப் பற்றிய விவரம் அறிந்து மக்கள் ஆரம்பத்திலேயே தடுக்க வேண்டும்.  

இவ்வாறு மத்திய அமைச்சர் பொன்.ராதாகிருஷ்ணன்  கூறினர்.