குடியரசுத் தலைவர் தேர்தல்: பாரதீய ஜனதா வேட்பாளருக்கு சசிகலா ஆதரவு – தினகரன் தகவல்

பதிவு செய்த நாள் : 24 ஜூன் 2017 00:14

சென்னை,

குடியரசுத் தலைவர் தேர்தலில் பாஜக வேட்பாளர் ராம்நாத் கோவிந்தை அதிமுக (அம்மா) அணி பொதுச் செயலாளர் வி.கே. சசிகலா ஆதரிப்பதாக அந்த அணியின் துணை பொதுச் செயலாளர் டிடிவி தினகரன் தெரிவித்துள்ளார்.

இது தொடர்பாக தினகரன் இன்று வெளியிட்ட அறிக்கையில்:

 நடைபெறவுள்ள குடியரசுத் தலைவர் பதவிக்கான தேர்தலில், பாரதிய ஜனதா கட்சியின் சார்பில் போட்டியிடும் வேட்பாளர் ராம்நாத் கோவிந்துக்கு அதிமுக (அம்மா) அணி நாடாளுமன்ற உறுப்பினர்களும், தமிழகம் மற்றும் புதுச்சேரி மாநிலச் சட்டமன்ற உறுப்பினர்களும் மற்றும் தோழமைக் கட்சிகளின் சட்டமன்ற உறுப்பினர்களும் வாக்களிப்பார்கள் என்பதை அதிமுக (அம்மா) பொதுச் செயலாளர் வி.கே. சசிகலா ஆணைப்படி மகிழ்ச்சியோடு தெரிவித்துக் கொள்கிறேன்.

இவ்வாறு டிடிவி தினகரன் அந்த அறிக்கையில் குறிப்பிட்டுள்ளார்.