ராமேஸ்வரம் மீனவர்கள் 10 பேர் சிறைபிடிப்பு: இலங்கை கடற்படை மீண்டும் அத்துமீறல்

பதிவு செய்த நாள் : 21 மார்ச் 2017 19:28

ராமேஸ்வரம்

ராமேஸ்வரம் மீனவர்கள் 10 பேரை சிறைபிடித்து இலங்கை கடற்படை மீண்டும் அத்துமீறலில் ஈடுபட்டுள்ளது.
கடந்த 6-ம் தேதி உச்சக் கட்டமாக தங்கச்சி மடத்தைச் சேர்ந்த மீனவர் பிரிட்ஜோ இலங்கை கடற்படையினரின் துப்பாக்கி சூட்டுக்கு பலியானார். இதனை தொடர்ந்து தங்கச்சிமடத்தில் மீனவர்கள் போராட்டம் நடத்தினர். போராட்டத்தில் ஈடுபட்ட மீனவர்களை மத்திய அமைச்சர்கள் நிர்மலா சீத்தாராமன், பொன்.ராதாகிருஷ்ணன் ஆகியோர் சந்தித்து மீனவர்கள்மீது இனிமேல் தாக்குதல் நடக்காது. உங்கள் கோரிக்கைகள் நிறைவேற்றப்படும். மத்திய வெளியுறவுத்துறை அமைச்சர் சுஷ்மாவைச்  சந்திக்க ஏற்பாடு செய்கிறோம். போராட்டத்தை கைவிடுங்கள் என கூறினர். இதனை ஏற்று மீனவர்கள் போராட்டத்தை கைவிட்டு மீனவர் பிரிட்ஜோ உடலை மருத்துவமனையிலிருந்து பெற்று இறுதி சடங்கு நடத்தினர்.

இந்தச் சூழலில் இலங்கை கடற்படையினர் மீண்டும் தமிழக மீனவர்கள்மீது தங்களது தாக்குதலை தொடங்கியுள்ளனர்.

கச்சத்தீவு அருகே மீன்பிடித்த மீனவர்கள் மீது கற்கள் வீசி தாக்குதல் நடத்தப்பட்டது. இந்த சம்பவம் ராமேஸ்வரம் மீனவர்களிடம் பெரிய அதிர்ச்சியை ஏற்படுத்தியது.
இதற்கிடையில், மத்திய வெளியுறவுத்துறை அமைச்சரை சந்திக்க மீனவர் குழு நேற்று டில்லி புறப்பட்டு சென்றது. இன்று மத்திய அமைச்சரை சந்தித்து பேச்சுவார்த்தை நடத்த இருக்கும் நிலையில், தங்கள் பிரச்னைகளுக்கு தீர்வு கிடைத்துவிடும் என தமிழக மீனவர்கள் நம்பியிருந்தனர்.

ராமேஸ்வரம் மற்றும் தங்கச்சிமடம் மீனவர்கள் 300 பேர் நேற்று மீன்பிடிக்கச் சென்றனர். இரவில் கச்சத்தீவு அருகே சிலர் மீன்பிடித்தபோது, அங்கு வந்த இலங்கை கடற்படையினர் 10 மீனவர்களை சிறைபிடித்து சென்றனர். மற்ற மீனவர்கள் கரை திரும்பியதும் மீனவர்கள் சிறை பிடிப்பு பற்றிய தகவல் வெளியானது.
தங்கச்சி மடத்தைச் சேர்ந்த ஜஸ்டீன் என்பவரது விசைப்படகு திடீரென கச்சத்தீவு அருகே பழுதானது. அதனை பழுது பார்க்கும் பணியில் 10 மீனவர்கள் ஈடுபட்டு இருந்தனர். அப்போது அங்கு ரோந்து கப்பல்களில் வந்த இலங்கை கடற்படையினர் அந்த படகை சுற்றிவளைத்து திடீர் தாக்குதல் நடத்தினர். பின்னர் படகையும், 10 மீனவர்களையும் சிறைபிடித்து காங்கேயம் துறைமுகம் கொண்டு சென்றதாக தெரிகிறது என மீனவர்கள் கூறினர்.

தமிழக முதல்வர் கே. பழனிசாமி - பிரதமர் மோடிக்கு கடிதம்

இலங்கை கடற்படையால் சிறை பிடிக்கப்பட்ட 10 மீனவர்களையும் விடுவிக்க வேண்டும் எனவும், இலங்கை வசமுள்ள தமிழக மீனவர்களின் படகுகள் 129ஐ விடுவிக்க கோரியும், மீனவர்கள் நலனுக்காக ஒதுக்கப்பட்ட நிதி ரூ. 1650 கோடியை உடனடியாக தமிழகத்திற்கு தருமாறும் தமிழக முதல்வர் கே. பழனிசாமி இந்திய பிரதமர் நரேந்திர மோடிக்கு இன்று கடிதம் எழுதியுள்ளார்.