மீனவர் கொலையில் 17 பேரிடம் விசாரணை : ஐகோர்ட் கிளையில் தமிழக அரசு விளக்கம்

பதிவு செய்த நாள் : 21 மார்ச் 2017 09:07


மதுரை:

மீனவர் பிரிஜோ சுட்டுக்கொல்லப்பட்டது தொடர்பாக இதுவரை 17 பேரிடம் விசாரணை நடத்தியுள்ளதாகவும், பிரிஜோ சென்ற படகில் பயன்படுத்தப்பட்ட ஜிபிஎஸ் (குளோபல் பொசிசனிங் சிஸ்டம்) கருவி, சென்னை ஐஐடிக்கு ஆய்வுக்கு அனுப்பப்பட்டிருப்பதாகவும் ஐகோர்ட் கிளையில் தமிழக அரசு தெரிவித்துள்ளது.

ராமநாதபுரம் ஆர்ஆர் சேதுபதி நகரைச் சேர்ந்த ராஜா, ஐகோர்ட் கிளையில் தாக்கல் செய்த பொதுநல மனு: இந்தியக் கடல் எல்லையில் மீன் பிடிக்கும் தமிழக மீனவர்கள் மீது இலங்கை கடற்படையினர் தாக்குதல் நடத்துவது தொடர்ச்சியாக நடந்து வருகிறது. அதைத் தடுக்க மத்திய அரசு உரிய நடவடிக்கை எடுக்கப்படவில்லை. இந்தியக் கடல் எல்லையில் மீன் பிடிக்கும் தமிழக மீனவர்களுக்கு உரிய பாதுகாப்பு வழங்க வேண்டும் என்று ஐகோர்ட் ஏற்கனவே உத்தரவிட்டுள்ளது. இருப்பினும் பாதுகாப்பு வழங்குவதில்லை.

இதுவரை தமிழக மீனவர்கள் 600 பேரை இலங்கை கடற்படையினர் சுட்டுக் கொன்றுள்ளனர். மீனவர்கள் விவகாரத்தில் இலங்கை அரசு மீது மத்திய அரசு மென்மையான போக்கைக் கடைபிடித்து வருகிறது. சில ஆண்டுகளுக்கு முன்னர் கேரளா கடல் பரப்பில் கன்னியாகுமரி மீனவர்கள் 2 பேரை இத்தாலி வீரர்கள் சுட்டுக் கொன்றனர். அந்த 2 வீரர்களையும் கேரளா மாநில போலீசார் கைது செய்தனர். கொல்லப்பட்ட மீனவர்கள் குடும்பங்களுக்கு இத்தாலி அரசு தலா ஒரு கோடி ரூபாய் இழப்பீடு வழங்கியது. ஆனால், பிரிஜோ குடும்பத்துக்கு மாநில அரசு 5 லட்சம் ரூபாய் இழப்பீடு வழங்கியது. மத்திய அரசு இழப்பீடு வழங்கவில்லை. பிரிஜோவை சுட்டுக்கொன்ற இலங்கை கடற்படை வீரர் யார்? என்பதை கண்டுபிடித்து அவரை இந்தியா கொண்டுவந்து தண்டிக்க வேண்டும். இவ்வாறு மனுவில் கூறியிருந்தார்.

இந்த மனு நீதிபதிகள் செல்வம், ஆதிநாதன் ஆகியோர் கொண்ட டிவிஷன் பெஞ்ச் முன் நேற்று விசாரணைக்கு வந்தது. அப்போது, மத்திய அரசு சார்பில் பதில் மனுத்தாக்கல் செய்ய 8 வாரம் அவகாசம் கோரப்பட்டது. தமிழக அரசு தரப்பில், பிரிஜோ கொலை தொடர்பாக இதுவரை 17 பேரிடம் விசாரணை நடத்தியுள்ளதாகவும், அடையாளம் தெரியாத இலங்கை கடற்படை வீரர் மீது வழக்குப்பதிவு செய்யப்பட்டுள்ளதாகவும் தெரிவிக்கப்பட்டது. மேலும், பிரிஜோ சென்ற படகில் பயன்படுத்தப்பட்ட ஜிபிஎஸ் (குளோபல் பொசிசனிங் சிஸ்டம்) கருவி சென்னை ஐஐடிக்கு ஆய்வுக்கு அனுப்பப்பட்டிருப்பதாகவும் தெரிவிக்கப்பட்டது. இதையடுத்து நீதிபதி, ஜிபிஎஸ் கருவி  ஆய்வுக்கு அனுப்பப்பட்டதற்கான ஆவணங்களை தாக்கல் செய்ய உத்தரவிட்டு, விசாரணையை  வரும் 21ம் தேதிக்கு(இன்று) ஒத்திவைத்தனர்.