முதலீட்டாளர்களின் முதல் முகவரி - தமிழ்நாடு என்ற கோவைக்கான ஒப்பந்தங்கள் கையெழுத்து

பதிவு செய்த நாள் : 23 நவம்பர் 2021 14:21

கோவை

கோயம்புத்தூர் கொடிசியா வளாகத்தில் “முதலீட்டாளர்களின் முதல் முகவரி - தமிழ்நாடு”  என்ற பெயரில் முதலமைச்சர் மு.க. ஸ்டாலின் தலைமையில் முதலீட்டாளர்கள் மாநாடு இன்று (23-11-2021) நடைபெற்றது.  இம்மாநாட்டில் 82 திட்டங்களின் மூலம் 52,549 கோடி ரூபாய் முதலீட்டில் 92,420  நபர்களுக்கு வேலைவாய்ப்புகள் உருவாக்கிடும் வகையில் பல திட்டங்களுக்கான புரிந்துணர்வு ஒப்பந்தங்கள் பரிமாற்றம் செய்யப்பட்டன. புதிய திட்டங்களுக்கு அடிக்கல் நாட்டப்பட்டது.

முதலமைச்சர் மு.க. ஸ்டாலின் அவர்கள் தலைமையில், தொழில் துறை சார்பில் “முதலீட்டாளர்களின் முதல் முகவரி - தமிழ்நாடு” என்ற முதலீட்டாளர்கள் மாநாடு, இன்று (23.11.2021) கோயம்புத்தூர், கொடிசியா வளாகத்தில் சிறப்புற நடைபெற்றது.  இம்மாநாட்டின் வாயிலாக மொத்தம் 82 திட்டங்களின் மூலம் 52,549 கோடி ரூபாய் முதலீட்டில் 92,420 நபர்களுக்கு வேலைவாய்ப்புகள் உருவாக்கப்பட்டுள்ளது.

இம்மாநாட்டில்,  கீழ்க்கண்ட நிகழ்வுகள் நடைபெற்றன:-

புரிந்துணர்வு ஒப்பந்தங்கள் பரிமாற்றம்

     இந்த நிகழ்ச்சியில்,  34,723 கோடி ரூபாய் முதலீட்டில் 74,835 நபர்களுக்கு வேலைவாய்ப்புகளை உருவாக்கிடும் வகையில் 52 புரிந்துணர்வு ஒப்பந்தங்கள் முதலமைச்சர் மு.க. ஸ்டாலின் முன்னிலையில் மேற்கொள்ளப்பட்டன.

வான்வெளி மற்றும் பாதுகாப்புத் துறையில் புரிந்துணர்வு ஒப்பந்தங்கள் பரிமாற்றம்

485 கோடி ரூபாய் முதலீடு மற்றும் 1,960 நபர்களுக்கு வேலைவாய்ப்பு என்ற வகையில், 7 வான்வெளி மற்றும் பாதுகாப்புத் துறையில் உதிரி பாகங்கள் உற்பத்தி மேற்கொள்ளப்படும் திட்டங்களுக்கு புரிந்துணர்வு ஒப்பந்தங்கள் முதலமைச்சர் மு.க. ஸ்டாலின் முன்னிலையில் பரிமாறிக்கொள்ளப்பட்டன. 

ஆக மொத்தம், ரூ.35,208 கோடி ரூபாய் முதலீட்டில், 76,795 நபர்களுக்கு வேலைவாய்ப்பை உருவாக்கிடும், 59 புரிந்துணர்வு ஒப்பந்தங்கள் மாண்புமிகு முதலமைச்சர் அவர்கள் முன்னிலையில் மேற்கொள்ளப்பட்டன. 

வான்வெளி மற்றும் பாதுகாப்புத் துறைக்கான கையேடு

     டிட்கோ நிறுவனம் தயாரித்துள்ள மாநிலத்தில் உள்ள வான்வெளி மற்றும் பாதுகாப்பு சார்ந்த தொழில் நிறுவனங்களின் கையேடு ஒன்றினையும் முதலமைச்சர் அவர்கள் இன்றைய தினம் வெளியிட்டார்கள். 

ஒவ்வொரு நிறுவனத்தின் உற்பத்தித் திறன், தொடர்பு விவரங்கள், உற்பத்திப் பொருட்களின் விவரம், சோதனைக்கான வசதிகள், ஆராய்ச்சி நிலையங்கள், முதற்கட்ட தொழில் பாதுகாப்பு பூங்காக்கள், அரசு வழங்கும் மானியங்கள் போன்ற விவரங்கள் இதில் இடம்பெற்றுள்ளன.  பாதுகாப்புத் தொழில் வழித்தடத்தில் தங்களது வாய்ப்புகளை மேம்படுத்திக் கொள்ளும் வகையில் இக்கையேடு முதலாம் மற்றும் இரண்டாம் அடுக்கு நிறுவனங்களுக்கும், OEM நிறுவனங்களுக்கும் வழங்கப்பட்டு, விநியோகச்சங்கிலி பலப்படுத்திட உதவிடும்.

வான்வெளி மற்றும் பாதுகாப்புத் தொழில்களுக்கான திறன்மிகு மையம்

வான்வெளி மற்றும் பாதுகாப்புத் தொழில் துறைகளுக்கான உற்பத்தியை மேம்படுத்த ஒரு திறன்மிகு மையத்தினை டிட்கோ நிறுவனம், டசோ சிஸ்டம்ஸ்  (M/s Dassault Systemes)  நிறுவனத்துடன் இணைந்து நிறுவ உள்ளது.  212 கோடி ரூபாய் முதலீட்டில் மேற்கொள்ளப்பட உள்ள, இத்திறன்மிகு மையம், பொருள் வடிவமைப்பு, உற்பத்தி மேம்பாடு, புரோட்டோ டைப்பிங், திறன் மேம்பாடு மற்றும் ஆராய்ச்சி மேம்பாடு போன்ற செயல் திறன்களை வான்வெளி மற்றும் பாதுகாப்பு தொழிலகங்களுக்கும், தொழில் முனைவோர்களுக்கும் வழங்கும்.  மேலும், இதன் மூலமாக, தமிழகத்தில் வான்வெளி மற்றும் பாதுகாப்பு தொழில் துறையில் புதிய தொழில் முனைவோர்களை உருவாக்குவதுடன், ஏற்கெனவே இயங்கி வரும் சிறு மற்றும் குறு தொழில் நிறுவனங்களுக்கும் பணியாளர்களின் செயல்திறனை மேம்படுத்த பயனுள்ளதாக இருக்கும்.  இதற்கான புரிந்துணர்வு ஒப்பந்தம்  முதலமைச்சர் அவர்கள் முன்னிலையில் பரிமாற்றப்பட்டது.

புதிய திட்டங்களுக்கு அடிக்கல் நாட்டுதல்

இந்நிகழ்ச்சியின்போது மாண்புமிகு முதலமைச்சர் அவர்கள் 13,413 கோடி ரூபாய் முதலீட்டில் 11,681 நபர்களுக்கு வேலைவாய்ப்புகளை உருவாக்கிடும் வகையில் பின்வரும் 13  திட்டங்களுக்கு அடிக்கல் நாட்டினார்கள்.

திட்டங்களைத் துவக்கி வைத்தல்

     மொத்தம் 3,928 கோடி ரூபாய் முதலீட்டில் 3,944 நபர்களுக்கு வேலைவாய்ப்புகளை உருவாக்கிடும் வகையில் பின்வரும் 10 திட்டங்களின் வணிக உற்பத்தியினை முதலமைச்சர் ஸ்டாலின் துவக்கி வைத்தார்கள்.

மேற்கூறிய 82 திட்டங்களின் மூலம் 52,549 கோடி ரூபாய் முதலீட்டில் 92,420  நபர்களுக்கு வேலைவாய்ப்புகள் உருவாக்கிட வகை செய்யப்பட்டுள்ளது. காஞ்சிபுரம், செங்கல்பட்டு, திருவள்ளூர், ராணிப்பேட்டை, கள்ளக்குறிச்சி, தருமபுரி, கிருஷ்ணகிரி, நாமக்கல், சேலம்,  திருச்சிராப்பள்ளி, புதுக்கோட்டை, கரூர், ஈரோடு, கோயம்புத்தூர், திருப்பூர், மதுரை, திண்டுக்கல், விருதுநகர், தூத்துக்குடி, திருநெல்வேலி, தென்காசி மற்றும் கன்னியாகுமாரி ஆகிய 22 மாவட்டங்களில் முதலீடுகள் பரவலாக மேற்கொள்ளப்பட உள்ளன.

தமிழ்நாடு நிதி நுட்பக் கொள்கை 2021 வெளியீடு

     2021-22 ம் ஆண்டிற்கான திருத்த வரவு செலவுத் திட்ட உரையில் அறிவித்தவாறே,  முதலமைச்சர் மு.க. ஸ்டாலின் நிதிநுட்பத் துறை வளர்ச்சிக்கு ஏதுவாகவும், மேம்பட்ட நிதிநுட்ப (Fintech) நிறுவனங்களின் முதலீடுகளை பெருமளவில் ஈர்த்திடும் வகையிலும் "தமிழ்நாடு நிதிநுட்பக் கொள்கை 2021'' யை வெளியிட்டார்கள்.

     மேலும், சென்னையில் நிதி நுட்ப நகரம் (Fin Tech City). இரண்டாம் மற்றும் மூன்றாம் அடுக்கு நகரங்களில், நியோ டைடல்  தொழில் நுட்பப் பூங்காக்கள் (Neo - TIDEL Parks) அமைத்தல் போன்ற பல சிறப்பம்சங்கள் இக்கொள்கையில் இடம் பெற்றுள்ளன.


முதலீட்டாளர்களின் முதல் முகவரி - தமிழ்நாடு மாநாட்டில் பரிமாறப்பட்ட புரிந்துணர்வு ஒப்பந்தங்களின் விவரம் மற்றும் தொழில் நிறுவனங்களின் விவரம் லிங்க் கீழே இணைக்கப்பட்டுள்ளது. கிளிக் செய்து பார்த்துகொள்ளவும்.

https://drive.google.com/file/d/1yy0M6YG_nrDOskQM8AzyvCa3auubeSAm/view?usp=sharing