ஆயுதபூஜை பண்டிகையையொட்டி 14, 15, 16ந் தேதி பள்ளிகளுக்கு பொது விடுமுறை - பள்ளிக்கல்வித்துறை அறிவிப்பு

பதிவு செய்த நாள் : 13 அக்டோபர் 2021 16:53

சென்னை

ஆயுதபூஜை, விஜயதசமியை பண்டிகையையொட்டி அக்டோபர் 14, 15, 16ந் தேதி பள்ளிகளுக்கு பொது விடுமுறை என தமிழ்நாடு பள்ளிக்கல்வித்துறை அறிவித்துள்ளது.

பொறியியல், பாலிடெக்னிக் கல்லூரிகளுக்கும் வரும் சனிக்கிழமை விடுமுறை என உயர்க்கல்வித்துறை அறிவித்துள்ளது

தமிழ்நாட்டில் கொரோனா 2-வது அலை கட்டுப்பாட்டுக்குள் வந்ததால் செப்டம்பர் 1-ம் தேதியிலிருந்து  9-ம் வகுப்பு முதல் 12-ம் வகுப்பு வரையிலான மாணவர்களுக்கு வகுப்புகள் தொடங்கப்பட்டது. தமிழக அரசு அறிவித்த கொரோனா வழிகாட்டுமுறைகளின்படி வகுப்புகள் நடைபெற்று வருகிறது.

செப்டம்பர் 1-ம் தேதியிலிருந்து  வாரத்தில் 6 நாட்கள் பள்ளிகள் செயல்பட்டு வருகின்றன. இதனால் மாணவர்கள் மற்றும் ஆசிரியர்கள் தொடர்ச்சியாக பள்ளிக்கு வருவதால் ஆயுதபூஜை மற்றும் விஜயதசமி பொதுவிடுமுறையை தொடர்ந்து வரும் சனிக்கிழமை (அக்டோபர் 16) அன்று விடுமுறை அறிவிக்கப்பட்டுள்ளது.

இது தொடர்பாக பள்ளிக்கல்வி ஆணையர் வெளியிட்டுள்ள செய்தி குறிப்பு விவரம் வருமாறு:

பல்வேறு ஆசிரியர் சங்கங்களிடமிருந்து பெறப்பட்ட கோரிக்கைகளில் செப்டம்பர் 1 முதல் பள்ளிகள் வாரத்தில் 6 நாட்களும் செயல்பட்டு வருவதாகவும் மாணவர்கள் விடுப்பின்றி பள்ளிக்கு வருகை புரிகின்றனர் என்றும் கணிசமான ஆசிரியர்கள் தங்களது சொந்த மாவட்டங்களிலிருந்து தொலைதூரத்தில் பணிபுரிந்து வருகின்றனர் என்றும் 14.10.2021 மற்றும் 15.10.2021 ஆகிய இருநாட்கள் அரசு விடுமுறையாக அறிவிக்கப்பட்டுள்ளதால் வார இறுதிநாளான சனிக்கிழமை 16.10.2021 அன்று விடுமுறை வழங்குமாறு கோரிக்கை விடுத்துள்ளனர். 

இக்கோரிக்கைகள் பரீசிலிக்கப்பட்டன. மாணவர்கள் மற்றும் ஆசிரியர்களின் நலன் கருதி 16.10.2021 அன்று பள்ளிகளுக்கு விடுமுறை வழங்கப்படுகிறது 

இவ்வாறு, பள்ளிக்கல்வி ஆணையர் அறிக்கையில் தெரிவித்துள்ளார்.