கொரோனா தொற்று தடுப்பு நடவடிக்கையாக முருகன், அம்மன், சிவன் கோவில்கள் திடீரென மூடல்

பதிவு செய்த நாள் : 01 ஆகஸ்ட் 2021 10:42

சென்னை

தமிழ்நாட்டில் கொரோனா தொற்று பரவல் மீண்டும் அதிகரித்துள்ளதை அடுத்து முக்கியமான முருகன், அம்மன், சிவன் கோவில்களில் ஆடிப்பெருக்கு விழாவுக்கும் தரிசனத்திற்கும் இன்று முதல் 3 நாட்கள் பக்தர்களுக்கு அனுமதி இல்லை என  தமிழ்நாடு அரசு நேற்று (31-7-2021) தடை விதித்து உத்தரவிட்டுள்ளது.

சென்னையில் கொரோனா தொற்று திடீரென அதிகரித்ததால் பல இடங்களில் கடைகளை மூடுமாறு மாநகராட்சி ஆணையிட்டது.

தொடர்ந்து, இந்து சமய அறநிலையத்துறையும் அறிவிப்புகளை வெளியிட்டது. அதன்படி,

வடபழனி முருகன் கோவிலில் சாமி தரிசனத்துக்கு இன்று பக்தர்கள் அனுமதிக்கப்படவில்லை.

இருப்பினும் தங்களது வேண்டுதல்களை கோவிலுக்கு வந்து பக்தர்கள் நிறைவேற்றினார்கள். பொங்கல் வைத்து எடுத்து வந்து கோவில் அருகில் முடி காணிக்கை செலுத்தினார்கள்.

கந்தகோட்டம் முருகன் கோவிலிலும் தரிசனம் ரத்து செய்யப்பட்ட போதிலும் பக்தர்கள் வெளியில் நின்று சாமி தரிசனம் செய்தனர்.

சூளை அங்காளம்மன் கோவிலில் ஆடி மாதம் முழுவதும் பெண்கள் அதிகளவில் கூடி அம்மனை வழிபடுவார்கள். கொரோனா பரவல் காரணமாக அங்கு கூட்டம் கூடுவதை தடுக்க இன்று தரிசனம் ரத்து செய்யப்பட்டு இருந்தது.

திருப்போரூர் முருகன் கோவிலிலும் பக்தர்கள் சாமி தரிசனத்துக்காக அனுமதிக்கப்படவில்லை.

மயிலாப்பூர் கபாலீஸ்வரர் கோவில், புரசைவாக்கம் கங்காதீஸ்வரர் கோவிலுக்கு இன்று காலையில் வழக்கம் போல பக்தர்கள் சாமி கும்பிட சென்றனர். ஆனால் கோவில் திறக்கப்படாமல் மூடி இருந்தது.

திருத்தணி முருகன் கோவில், காஞ்சிபுரம் மாவட்டத்தில் உள்ள குமரக்கோட்டம், வல்லக்கோட்டை, குன்றத்தூர் முருகன் கோவில்களிலும் பக்தர்கள் சாமி தரிசனத்துக்காக இன்று அனுமதிக்கப்படவில்லை. ஆனால் கோவில்களில் வழக்கம் போல பூஜைகள் மட்டும் நடைபெற்றன.

திருவேற்காடு தேவி கருமாரியம்மன் கோவில், பெரியபாளையம் பவானி அம்மன் கோவில், சிறுவாபுரி பாலசுப்பிரமணிய சுவாமி கோவில், ஆண்டாள் குப்பம் பாலசுப்பிரமணிய சுவாமி கோவில், புட்லூர் பூங்காவனத்தம்மன் கோவில் ஆகிய கோவில்களில் இன்று முதல் 3 நாட்கள் பக்தர்களுக்கு அனுமதி இல்லை என்று திருவள்ளூர் கலெக்டர் ஆல்பி ஜான் வர்கீஸ் அறிவித்துள்ளார்.

திருச்சி - உறையூர் வெக்காளியம்மன் கோவிலில் ஆடி மாதம் முழுவதுமே பக்தர்கள் அதிகளவில் தரிசனம் செய்வார்கள். இன்று அந்த கோவிலிலும் தரிசனம் ரத்து செய்யப்பட்டு இருந்தது.

ஸ்ரீரங்கம் ரங்கநாதர், சமயபுரம் மாரியம்மன் கோவில்களிலும் பக்தர்கள் சாமி தரிசனம் செய்ய அனுமதிக்கப்படவில்லை. இதையடுத்து கோவிலுக்கு வெளியில் நின்று பக்தர்கள் தரிசனம் செய்தனர்.

வயலூர் முருகன் கோவில், திருவானைக்காவல் ஜம்புகேஸ்வரர் ஆலயம் ஆகியவற்றிலும் இன்று பக்தர்களுக்கு அனுமதி அளிக்கப்படவில்லை.

ஆகஸ்ட் 3-ந் தேதி ஆடிப்பெருக்கு நாளாகும். அன்று நீர்நிலைகள், ஆறுகள் இருக்கும் பகுதிகளில் பக்தர்கள் அதிகளவில் கூடி, பூஜையில் ஈடுபவார்கள் என்பதை கருத்தில் கொண்டு, கொரோனா தொற்று பரவலை தடுக்க தமிழ்நாடு முழுவதும் ஆடிப்பெருக்கு விழாவுக்கு தடை விதிக்கப்பட்டுள்ளது குறிப்பிடத்தக்கது.