திருவாரூர் தியாகராஜர் சுவாமி கோயிலின் ஆழித் தேரோட்டம் இன்று தொடங்கியது

பதிவு செய்த நாள் : 25 மார்ச் 2021 09:48

திருவாரூர்: 

திருவாரூர் மாவட்டம் தியாகராஜர் சுவாமி கோயிலின் ஆழித் தேரோட்டம் இன்று காலை வெகு விமரிசையாகத் தொடங்கியது. பக்தர்கள் ஆரூரா! தியாகராஜா! அரோகரா என பக்தி கோஷமிட்டு ஆசியாவிலேயே பெரிய தேராகிய ஆழித் தேரை வடம்பிடித்து இழுத்தனர்.

  மரத்தால் மிகப்பெரிய அளவில் தேர்களை அழகுற அமைத்து அதன் மீது தெய்வ திருவுருவங்களை வைத்து வீதிகளில் பவனி வரச்செய்து பெருவிழாவாக எடுக்கும் மரபு தொன்று தொட்டு நடைபெற்று வருகிறது. சோழ மன்னர்களும், அவர்களுக்கு பிறகு விஜயநகர அரசர்களும் பல தேர்களை செய்து அளித்ததற்கான கல்வெட்டு சான்றுகள் உள்ளன. இவ்வாறு சிறப்பு வாய்ந்த தேர்களில் ஒன்று திருவாரூர் தியாகராஜர் கோவின் ஆழித்தேர் ஆகும்.

மனிதன் பிறக்க ஆரூர்,  இறக்க காசி என்பது பழமொழி...

பிறந்தாலே முக்தி தரும் திருவாரூரில் சிபிச் சக்கரவர்த்தி, மனுநீதிச் சோழன் ஆகியோர் ஆட்சி செய்துள்ளனர்.

திருவாரூரில் பழங்காலத்தில் இருந்து ஆழித்தேரோட்டம் நடைபெற்றதற்கான கல்வெட்டு சான்றுகள் உள்ளன.

  கி.பி. 1748-ம் ஆண்டு கிடைத்த ஆவணத்தின் மூலம், 18 மற்றும் 19-ம் நூற்றாண்டுகளில் தேர் திருவிழா நடைபெற்றுள்ளது.

1926-ம்ஆண்டு நடைபெற்ற தேரோட்டத்தின் போது ஏற்பட்ட தீவிபத்தில் தேர் முற்றிலும் எரிந்து பழுதடைந்தது.

பின்னர் தியாகராஜ பெருமான் தொண்டர்கள் அனைவரும் ஒன்று கூடி 1928-ம் ஆண்டு புதிய தேர் செய்ய முடிவுசெய்து பொருளுதவி ஈட்டினர். 1928-ம் ஆண்டு புதிய தேர் கட்டுமான பணி தொடங்கி 1930-ம் ஆண்டு முழுவதுமாக தயாரானது.

பின்னர் 2-3-1930-ம் அன்று புதிய தேரோட்டம் ஆரம்பித்தது.

திருவாரூர் தேரின் சிறப்பு

திருவாரூர் தேருக்குரிய தனித்த சிறப்பு வடிவமைப்பிலேயே புதிய தேரும் உருவாக்கப்பட்டது. 96 அடி உயரம் 220 டன் எடையுடன் கூடிய திருவாரூர் ஆழித் தேர் காண்போரை வியக்க வைக்கும் வகையில் உருவாக்கப்பட்டுள்ளது.

பிரை சூடிய தியாகராஜப் பெருமான் திருவாரூர் கோவில் மிகவும் பிரசித்தி பெற்றது.

  பல்வேறு சிறப்புகளை கொண்ட ஆழித்தேரோட்டம் இன்று நடைபெறுகிறது. பஞ்ச பூத தலங்களில் பூமிக்குரிய தலமாக விளங்கும் திருவாரூர் தியாகராஜர் கோயிலில் நடைபெறும் ஆழித் தேரோட்டம் உலகப் புகழ் பெற்றதாகும்.

  பங்குனி உத்திரப் பெருவிழாவையொட்டி முக்கிய வீதிகளில் ஆழித் தேர் இன்று பவனி வருகிறது. இந்த தேரோட்டத்தில் பக்தர்கள் கலந்து கொண்டு தியாகராஜ பெருமானை தரிசனம் செய்து ஆரவாரத்தில் ஈடுபட்டுள்ளனர்.

ஆழித் தேரோட்டத்தை முன்னிட்டு இன்று திருவாரூர் மாவட்டத்திற்கு விடுமுறை அளித்துள்ளார் மாவட்ட ஆட்சியர்.