ருசியான பன்னீர் போண்டா

பதிவு செய்த நாள் : 28 பிப்ரவரி 2021 10:48

தேவையான பொருட்கள்:

கடலை மாவு - 1 கப் ,

பன்னீர் - 1 கப் (சதுர துண்டுகளாக்கப்பட்டது) ,

அரிசி மாவு - 1/4 கப், 

 மிளகாய் தூள் - 1 டீஸ்பூன் ,

மிளகுத் தூள் - 1 டீஸ்பூன் ,

கரம் மசாலா - 1/2 டீஸ்பூன் ,

சீரகப் பொடி - 1 டீஸ்பூன்,

துருவிய இஞ்சி - 1 டீஸ்பூன், 

கறிவேப்பிலை - சிறிது ,

கொத்தமல்லி - சிறிது, 

புதினா - 2 டேபிள் ஸ்பூன் ,

வெங்காயம் - 1 (பொடியாக நறுக்கியது) ,

பச்சை மிளகாய் - 1 (பொடியாக நறுக்கியது) ,

தண்ணீர் - தேவையான அளவு ,

எண்ணெய் - பொரிப்பதற்கு தேவையான அளவு,

உப்பு - சுவைக்கேற்ப ,

பேக்கிங் சோடா/சமையல் சோடா - 1/2 டீஸ்பூன்.

செய்முறை:

 முதலில் ஒரு பௌலில் கடலை மாவை எடுத்துக் கொள்ள வேண்டும்.  பின் அதில் அரிசி மாவு மற்றும் உப்பு சேர்த்துக் கொள்ள வேண்டும். பின்பு மிளகாய் தூள், மிளகுத் தூள், கரம் மசாலா, சீரகப் பொடி சேர்த்துக் கொள்ள வேண்டும்.  அடுத்து அதில் வெங்காயம் மற்றும் பச்சை மிளகாயைப் போட வேண்டும். 

 பிறகு கொத்தமல்லி, புதினா மற்றும் கறிவேப்பிலை சேர்க்க வேண்டும். அடுத்து அதில் நீரை ஊற்றி போண்டா பதத்திற்கு ஓரளவு கெட்டியான பதத்தில் பிசைந்து கொள்ள வேண்டும்.  பின் அதில் பன்னீர் துண்டுகள், பேக்கிங் சோடா சேர்த்து நன்கு கிளறி விட வேண்டும். இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், பிசைந்து வைத்துள்ள போண்டா மாவை சிறிது சிறிதாக போட்டு, பொன்னிறமாக பொரித்து எடுத்தால், சுவையான பன்னீர் போண்டா தயார்.