பட்டா பெயர் மாற்றத்திற்கு ரூ.15 ஆயிரம் லஞ்சம் , மானூர் மண்டல துணை தாசில்தார் கைது

பதிவு செய்த நாள் : 15 செப்டம்பர் 2020 21:32

நெல்லை மாவட்டம் மானூர் வட்டாட்சியர் அலுவலகத்தில் பட்டா பெயர் மாற்றத்திற்கு 15 ஆயிரம் ரூபாய் லஞ்சம் வாங்கிய மண்டல துணை வட்டாட்சியரை மாவட்ட லஞ்ச ஒழிப்பு போலீசார் கைது செய்தனர்

நெல்லை மாவட்டம் மூன்றடைப்பு கோவில் தெருவைச் சேர்ந்தவர் அன்புஹெரால்ட். பட்டதாரியான இவர் தற்போது கூலி வேலை செய்து வருகிறார் . இவரது தாத்தா எலிசாவிற்கு மானூர் வட்டத்திற்கு உட்பட்ட பல்லிக்கோட்டை அருகே 19 சென்ட் நிலம் உள்ளது. இந்த நிலம் 1978-ம் ஆண்டு வாங்கப்பட்டது. தனது தாத்தா பெரியல் உள்ள நிலத்தினை தனது பெயருக்கு பட்டா பெயர் மாற்றம் செய்ய மானூர் வட்டாட்சியர் அலுவலகத்தில் மனு செய்துள்ளார் . விண்ணப்பத்தை பெற்றுக்கொண்ட அதிகாரிகள் பெயர் மாற்றம் செய்யாமல் நீண்ட நாட்களாக காலம் தாழ்த்தி வந்துள்ளனர் . மீண்டு பட்டா பெயர் மாற்றம் கேட்டு மனு செய்த நிலையில் அங்கு பணியாற்றும் மண்ட துணை வட்டாட்சியர் மாரியப்பன் பட்டா பெயர் மாற்றத்திற்கு 20 ஆயிரம் ரூபாய் லஞ்சம் கேட்டுள்ளார் . ஆனால் அன்புஹெரால்ட் அவ்வளவு பணம் கொடுக்க முடியாது என தெரிவித்துள்ளார் . இறுதியில் 15 ஆயிரம் ரூபாய் தருமாறு பேசி முடித்துள்ளார் . இதனையடுத்து அன்பு ஹெரால்ட் மாவட்ட லஞ்ச ஒழிப்பு போலீசாரிடம் இதுகுறித்து புகார் அளித்தார் . புகாரை பெற்றுக்கொண்ட போலீசார் அவரிடம் ரசாயனக்கலவை தடவிய பணத்தை கொடுத்து அவரிடம் கொடுக்குமாறு தெரிவித்தனர் . இதனையடுத்து போலீசார் அறிவுரைப்படி மண்டல துணை வட்டாட்சியர் மாரியப்பனிடம் பணம் கொடுத்த போது அங்கு மறைந்திருந்த மாவட்ட லஞ்ச ஒழிப்புத்துறை துணை கண்காணிப்பாளர் எஸ்கால் , ஆய்வாளர் ராபின்ஞானசிங் மற்றும் போலீசர் கையும் களவுமாக மாரியப்பனை கைது செய்து பணத்தை பறிமுதல் செய்தனர் . பட்டா பெயர்மாற்றதிற்கு லஞ்சம் பெற்று துணை தாசில்தார் கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது.