கொரோனா கொடூரம் சங்கரன்கோவில் மூடப்பட்ட விசைத்தறிக் கூடங்கள் 11- நாட்களுக்கு பின் திறப்பு , அரை நாட்கள் மட்டுமே இயக்க முடிவு

பதிவு செய்த நாள் : 01 ஆகஸ்ட் 2020 15:24

பாளையங்கோட்டை,

தென்காசி மாவட்டம் சங்கரன்கோவிலில் கொரோனா வைரஸ் தீவிரமடைந்து வருவதைத் தொடர்ந்து  கடந்த 21-ந்தேதி  முதல் மூடப்பட்டிருந்த விசைத்தறிக் கூடங்கள் 11 நாட்களுக்கு பிறகு இன்று முதல் செயல்படத் தொடங்கியது. இதனைத்தொடர்ந்து 5 ஆயிரம் விசைத்தறிக்கூடங்களில் பணிகள் நடந்து வருகிறது.


தென்காசி மாவட்டம் சங்கரன்கோவில் பகுதிகளில் 5 ஆயிரம் விசைத்தறிக் கூடங்கள் இயங்கி வருகின்றன.. இதில் நேரிடையாகவும் , மறைமுகமாகவும் சுமார் 15 ஆயிரம் தொழிலாளர்கள் பணியாற்றி வருகின்றனர் .இங்கு உற்பத்தி செய்யப்படும் சேலை , லுங்கி , டவல் உள்ளிட்டவைகள் வெளிமாவட்டம் மற்றும் வெளிமாநிலத்திற்கு ஏற்றுமதி செய்யப்படுகிறது. 


நாள் ஒன்றுக்கு ஒரு கோடி ரூபாய் மதிப்பில் உற்பத்தி நடக்கிறது. இந்நிலையில் சங்கரன்கோவில் பகுதியில் கொரோனா வைரஸ் தீவிரமாக பரவி வந்த நிலையில்  தொழிலாளர்களின் பாதுகாப்பை கருத்தில் கொண்டு அரசு மற்றும் சுகாதாரத்துறையினருக்கு ஒத்துழைப்பு அளிக்கும் வகையில்  கடந்த 21-ந்தேதி   முதல் 31-ந்தேதி வரை 11  நாட்களுக்கு  விசைத்தறிக் கூடங்கள் மூடப்பட்டு இருந்தது. இதனால் நாள் ஒன்றுக்கு 1 கோடி ரூபாய் இழப்பு ஏற்பட்டு வந்ததுடன் 10 ஆயிரத்திற்கும் மேற்பட்ட தொழிலாளர்களுக்கு பணி இழப்பு ஏற்பட்டு வந்தது. இந்நிலையில் இன்று முதல் மீண்டும் விசைத்தறிக் கூடங்கள் செயல்படத் தொடங்கியது. சங்கரன்கோவில் மற்றும் அதன் சுற்றுவட்டாரப்பகுதிகளில் சுமார் 5 ஆயிரம் விசைத்தறிக் கூடங்கள் இயங்கத் தொடங்கி பணிகள் நடந்து வருகிறது.


கொரோனா ஊரடங்கு காரணமாகவும் , மூலப்பொருட்கள் ஊரடங்கு காரணமாக வருவதில் சிரமம் உள்ளது அதனால் தட்டுபாடு ஏற்பட்டு வருகிறது எனவே ஊரடங்கு முடியும் வரை காலை முதல் மதியம் வரை அரை நாள் மட்டும் விசைத்தறிக் கூடங்கள் இயங்கும் என விசைத்தறி உரிமையாளர்கள் தெரிவித்துள்ளனர் .