டெங்கு காய்ச்சலால் தமிழ்நாட்டில் உயிரிழப்புகள் இல்லை : அமைச்சர் விஜயபாஸ்கர் பேட்டி

பதிவு செய்த நாள் : 06 அக்டோபர் 2019 15:40

சென்னை,

அண்டை மாநிலங்களான ஆந்திரா, கேளராவில் டெங்கு காய்ச்சல் பாதிப்பால் உயிரிழப்புகள் ஏற்பட்டிருந்தாலும், தமிழ்நாட்டில் சிறப்பான சிகிச்சையால் டெங்கு காய்ச்சல் பாதிப்பால் உயிரிழப்புகள் ஏற்படவில்லை என சுகாதாரத்துறை அமைச்சர் சி. விஜயபாஸ்கர் இன்று தெரிவித்துள்ளார்.

கன்னியாகுமரி மாவட்டம், நாகர்கோவில் - ஆசாரிபள்ளம்  அரசு மருத்துவக் கல்லூரியில் மக்கள் நல்வாழ்வு மற்றும் குடும்ப நலத்துறை அமைச்சர்  டாக்டர் சி. விஜயபாஸ்கர் மற்றும் தமிழ்நாடு - டெல்லி சிறப்பு பிரதிநிதி தளவாய் சுந்தரம் ஆகியோர் மருத்துவ ஆய்வகம் (cath_Lab) மற்றும் சிகிச்சைப்பிரிவு மையங்களை இன்று திறந்து வைத்தனர்.

பின்னர் செய்தியாளர்களை சந்தித்த அமைச்சர் சி. விஜயபாஸ்கர்,

தமிழ்நாட்டில் மகப்பேறு மருத்துவம் 70 சதவீதம் அரசு மருத்துவமனையில் நடப்பதாகவும், மீதம் 30 சதவீதம் மட்டுமே தனியார் மருத்துவமனைகளில் நடப்பதாக தெரிவித்தார்.

தமிழ்நாட்டில் அரசு மருத்துவர்கள் தனியாக கிளினிக் நடத்துவதை தடுத்து நிறுத்துவது என்பது சாத்தியமில்லாத ஒன்று எனவும் அமைச்சர் விஜயபாஸ்கர் கூறினார்.