பிஎஸ்என்எல் முறைகேடு வழக்கு: கலாநிதி மாறன், தயாநிதி மாறன் உள்பட 7 பேர் விடுவிப்பு

பதிவு செய்த நாள் : 14 மார்ச் 2018 15:52

சென்னை,

 பிஎஸ்என்எல் தொலைபேசி முறைகேடு வழக்கில் இருந்து கலாநிதி மாறன், தயாநிதி மாறன் உள்பட 7 பேரை விடுதலை செய்து சென்னை சிபிஐ நீதிமன்றம் உத்தரவிட்டுள்ளது.

பிஎஸ்என்எல் தொலைபேசி இணைப்புகளை முறைகேடாக சன் டிவிக்குப் பயன்படுத்தி அரசுக்கு கோடிக்கணக்கில் இழப்பு ஏற்படுத்தியதாக தொடரப்பட்ட வழக்கிலிருந்து தங்களை விடுவிக்க கோரி கலாநிதி மாறன், தயாநிதி மாறன் சகோதரர்கள் உள்ளிட்ட 7 பேர் சார்பில் தாக்கல் செய்த மனுக்கள் மீது வாதம் முடிவடைந்த நிலையில் சிபிஐ நீதிமன்றம் இன்று தீர்ப்பளித்தது.

மத்திய தொலைத் தொடர்புத் துறை அமைச்சராக இருந்த தயாநிதிமாறன் தனது அதிகாரத்தைப் தவறாகப் பயன்படுத்தி, சன் டிவிக்கு பிஎஸ்என்எல் அதிவேக தொலைபேசி இணைப்புகளை, முறைகேடாக பயன்படுத்தியதாகக் குற்றச்சாட்டு எழுந்தது.

சட்ட விரோதமாக தொலைபேசி இணைப்புகளை பயன்படுத்தியதால்  அரசுக்கு கோடிக்கணக்கில் இழப்பு ஏற்படுத்தியதாக தயாநிதி மாறன் மற்றும் கலாநிதி மாறன் ஆகியோர் மீது குற்றம் சாட்டப்பட்டது.

இந்த மோசடி தொடர்பாக மாறன் சகோதரர்கள் மற்றும் பிஎஸ்என்எல் பொது மேலாளராக பதவி வகித்த கே. பிரம்மநாதன், அந்நிறுவனத்தின் முன்னாள் துணைப் பொது மேலாளர் வேலுச்சாமி, தயாநிதி மாறனின் தனிச் செயலாளரான கவுதமன், சன் டி.வி. ஊழியர் கண்ணன், ரவி ஆகிய 7 பேர் மீது சிபிஐ வழக்குப் பதிவு செய்தது.

இந்த வழக்கு விசாரணை சென்னை சிபிஐ சிறப்பு நீதிமன்றத்தில் நடந்து வருகிறது. கடந்த 2016 ம் ஆண்டில், இந்த வழக்கில் டில்லி சிபிஐ போலீசார் குற்றப் பத்திரிகை தாக்கல் செய்தனர். இதில் மாறன் சகோதரர்கள் உள்ளிட்ட 7 பேருக்கும் கடந்த 2017ம் ஆண்டு ஜூலை மாதம் குற்றப் பத்திரிக்கை நகல் வழங்கப்பட்டது.இந்த வழக்கில் இருந்து தங்களை விடுவிக்கக் கோரி மாறன் சகோதரர்கள் உள்ளிட்ட 7 பேர் சார்பில் கடந்த 2017–ம் ஆண்டு அக்டோபர் மாதம் மனு தாக்கல் செய்யப்பட்டது.

இந்த வழக்கு சென்னை 14 வது சிபிஐ நீதிமன்ற நீதிபதி நடராஜன் முன் நடந்து வந்தது. மாறன் சகோதரர்கள் உள்ளிட்ட 7 பேரை வழக்கில் இருந்து விடுவிக்க கோரி மூத்த வழக்கறிஞர்கள் ஆஜராகி வாதிட்டனர். ஆனால், குற்றம் சாட்டப்பட்டவர்களை வழக்கில் இருந்து விடுவிக்க சிபிஐ தரப்பில் எதிர்ப்பு தெரிவிக்கப்பட்டது.

எனினும், பிஎஸ்என்எல் முறைகேடு வழக்கில் மாறன் சகோதரர்கள் மீது குற்றம்சாட்ட எந்த முகாந்திரமும் இல்லை என்று கூறி சென்னை சிபிஐ நீதிமன்றம் தீர்ப்பில் குறிப்பிட்டுள்ளது.

பிஎஸ்என்எல் முறைகேடு வழக்கில் இருந்து கலாநிதி மாறன், தயாநிதி மாறன் உள்பட 7 பேரை விடுதலை செய்து சென்னை சிபிஐ நீதிமன்றம் உத்தரவிட்டுள்ளது.