காவிரி பற்றி சிறப்புத் தீர்மானம் நிறைவேற்ற தமிழக சட்டப்பேரவை சிறப்பு கூட்டம் கூடுகிறது

பதிவு செய்த நாள் : 13 மார்ச் 2018 18:16

சென்னை,

காவிரி பிரச்சினையில் தீர்மானம் நிறைவேற்ற தமிழக சட்டப்பேரவை சிறப்பு கூட்டம் கூடும் தேதி வரும் 15ம் தேதி முடிவாகும் என எதிர்பார்க்கப்படுகிறது.

காவிரி நீர் பங்கீடு தொடர்பான மேல்முறையீட்டு வழக்கை விசாரித்த உச்ச நீதிமன்றம், தமிழகத்துக்கான தண்ணீரின் அளவை குறைத்து கடந்த மாதம் 16-ம் தேதி தீர்ப்பு வழங்கியது. அத்துடன், ஏற்கனவே நடுவர் மன்றம் வழங்கிய தீர்ப்பின்படி காவிரி மேலாண்மை வாரியம் மற்றும் காவிரி ஒழுங்காற்று குழு ஆகியவற்றை 6 வாரங்களுக்குள் அமைக்க வேண்டும் என்றும் மத்திய அரசுக்கு உத்தரவிட்டது.
இதைத்தொடர்ந்து காவிரி மேலாண்மை வாரியத்தை உடனடியாக அமைக்க வேண்டும் என்று

தமிழக அரசும், தமிழக அரசியல் கட்சிகளும் மத்திய அரசை வற்புறுத்தி வருகின்றன.  

காவிரி மேலாண்மை வாரியம் அமைப்பது தொடர்பாக டில்லியில் நடந்த 4 மாநில உயரதிகாரிகளுடனான மத்திய அரசின் ஆலோசனை கூட்டத்தில் கலந்து கொண்ட தமிழக தலைமை செயலாளர் கிரிஜா வைத்தியநாதன் உள்ளிட்ட அதிகாரிகள் வாரியம் அமைக்க வலியுறுத்தினர்.

மக்களவையிலும், மாநிலங்களவையிலும் அ.தி.மு.க., திமுக, எம்.பி.க்கள் தொடர்ந்து இதனை வலியுறுத்தி வந்தனர். ஆனால் காவிரி மேலாண்மை வாரியத்தை அமைக்க கர்நாடகம் கடும் எதிர்ப்பு தெரிவித்து வருகிறது.

இந்த நிலையில், காவிரி பற்றிய சிறப்புத் தீர்மானம் நிறைவேற்ற தமிழக சட்டமன்றத்தின் சிறப்பு கூட்டம் கூட உள்ளது.

காவிரி மேலாண்மை வாரியம் அமைக்க வலியுறுத்தி இந்த சிறப்பு கூட்டத்தில் தீர்மானம் நிறைவேற்ற முடிவு செய்யப்பட்டு உள்ளது.

மார்ச் 15–ம் தேதி பட்ஜெட் தாக்கலான பிறகு, சிறப்பு சட்டமன்றம் கூடும் தேதி மாலையில் முடிவாகும் எனத் தெரிகிறது.