காரைக்குடி ‘திரில்’ வெற்றி

பதிவு செய்த நாள் : 08 ஆகஸ்ட் 2017

திருநெல்வேலி

திண்டுக்கல் அணிக்கு எதிரான டி.என்.பி.எல்., ‘டுவென்டி-20’ தொடரின் லீக் ஆட்டத்தில் பவுலர்கள் அசத்த காரைக்குடி அணி 7 ரன் வித்தியாசத்தில் ‘திரில்’ வெற்றி பெற்றது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 20வது லீக் ஆட்டம் திருநெல்வேலியில் உள்ள இந்தியா சிமென்ட்ஸ் மைதானத்தில் இன்று நடைபெற்றது. இதில், திண்டுக்கல், காரைக்குடி அணிகள் மோதின. ‘டாஸ்’ வென்ற காரைக்குடி கேப்டன் பத்ரிநாத் முதலில் ‘பேட்டிங்கை’ தேர்வு செய்தார். காரைக்குடி அணிக்கு துவக்கம் சிறப்பாக  அமையவில்லை. நடராஜன் வேகத்தில் ராஜ்குமார் ‘டக்-அவுட்’ ஆனார். அடுத்து வந்த சீனிவாசன் (13) ஏமாற்றினார். பின் விஷால் வைத்யாவுடன் கேப்டன்  பத்ரிநாத் ஜோடி சேர்ந்தார். இருவரும் பொறுப்புடன் விளையாடி ரன் எடுத்து வந்தனர். அரைசதம் அடிப்பார் என எதிர்பார்த்த நிலையில், விஷால் வைத்யா 41 ரன் (37 பந்து, 2 பவுண்டரி, 2 சிக்சர்) எடுத்து விக்டர் பந்தில் வெளியேறினார். பத்ரிநாத் (28), ஷாஜகான் (20), கணபதி (18) ஆதித்யா (10) கைகொடுத்தனர். முடிவில் காரைக்குடி அணி 20 ஓவரில் 7 விக்கெட் இழப்புக்கு 150 ரன் எடுத்தது. சோனு யாதவ் (0), யோகேஷ்வர் (4) ஆட்டமிழக்காமல் இருந்தனர். திண்டுக்கல் தரப்பில் விக்டர், சஞ்சய் தலா 2 விக்கெட் வீழ்த்தினர்.

எளிதான இலக்கை துரத்திய திண்டுக்கல் அணிக்கு சுப்ரமணிய சிவா (17) அதிர்ச்சி கொடுத்தார். 3 பவுண்டரிகளுடன் கணக்கை துவக்கிய விக்கெட்கீப்பர் ஜெகதீசன் 14 ரன் எடுத்த நிலையில், சுரேஷ் பாபு பந்ததில் ஆட்டமிழந்தார். கங்கா ஸ்ரீதர் ராஜூ (27) ஓரளவு கைகொடுத்தார். கேப்டன் வெங்கட்ராமன் (3),  விக்டர் (8), சன்னி குமார் சிங் (3) சொதப்ப ஆட்டம் பரபரப்பானது. 15வது ஓவரில் திண்டுக்கல் 100 ரன் எடுத்தது. இதையடுத்து 5 ஓவரில் 51 ரன்  தேவைப்பட விவேக் அதிரடியில் இறங்கினார். இவருக்கு கிஷன் குமார் கம்பெனி கொடுத்தார். முக்கிய கட்டத்தில் விவேக் (32) வெளியேற ஆட்டம் காரைக்குடி வசம் சென்றது. கடைசி ஓவரில் 17 ரன் தேவைப்பட மோகன் பிரசாந்த் பந்து வீச வந்தார். இந்த ஓவரில் ஆதித்ய அருண் (14), கிஷன் குமார் (14), சஞ்சய் (1) பெவிலியன் திரும்பினர். முடிவில் திண்டுக்கல் அணி 20 ஓவரில் 143 ரன்னுக்கு ஆட்டமிழந்து பரிதாபமாக தோற்றது. நடராஜன் (0) ஆட்டமிழக்காமல் இருந்தார்.

இந்த வெற்றியின் மூலம் காரைக்குடி அணி இதுவரை விளையாடிய 6 போட்டிகளில் 3 வெற்றி, 3 தோல்வி என மொத்தம் 6 புள்ளிகளுடன் புள்ளிப்  பட்டியலில் மூன்றாவது இடத்திற்கு முன்னேறியது. திண்டுக்கல் அணி 5 புள்ளிகளுடன் நான்காவது இடத்தில் உள்ளது