தூத்துக்குடி 6வது வெற்றி

பதிவு செய்த நாள் : 06 ஆகஸ்ட் 2017

திருநெல்வேலி

டி.என்.பி.எல்., ‘டுவென்டி-20’ தொடரில் நடப்பு சாம்பியன் தூத்துக்குடி 6வது வெற்றியை பதிவு செய்யது. இந்த முறை 6 விக்கெட் வித்தியாசத்தில்  திருவள்ளூர் அணியை வீழ்த்தியது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இத்தொடரின் 18வது லீக் ஆட்டம் திருநெல்வேலியில் உள்ள இந்தியா சிமென்ட்ஸ்  மைதானத்தில் இன்று இரவு நடைபெற்றது. ‘டாஸ்’ வென்ற திருவள்ளூர் கேப்டன் அபராஜித் முதலில் ‘பேட்டிங்கை’ தேர்வு செய்தார்.

திருவள்ளூர் அணிக்கு சஞ்சய் யாதவ் அதிரடியாக விளையாடி அசத்தினார். அதே நேரம் மறுமுனையில் சதுர்வேத் (4) நடையை கட்டினார். மூர்த்தி பந்தில் சிதாரத் (16) ஆட்டமிழந்தார். பொறுப்புடன் விளையாடிய சஞ்சய் யாதவ் அரைசதம் கடந்தார். இவருக்கு கம்பெனி கொடுத்த கேப்டன் அபராஜித்  அரைசதத்தை பதிவு செய்ய ஸ்கோர் ராக்கெட் வேகத்தில் பறந்தது. இருந்தும் முக்கிய கட்டத்தில் சஞ்சய் யாதவ் 61 ரன் (50 பந்து, 5 பவுண்டரி, 1 சிக்சர்)  எடுத்து ஆட்டமிழந்தார். இவரைத் தொடர்ந்து அபராஜித்தும் வெளியேற ஆட்டம் பரபரப்பானது. அபராஜித் 58 ரன் (38 பந்து, 4 பவுண்டரி, 2 சிக்சர்) எடுத்தார். கடைசி கட்டத்தில் ரங்கராஜன் (13*), சுஜாய் (6*) கைகொடுக்க திருவள்ளூர் அணி 20 ஓவரில் 4 விக்கெட்டுகளை இழந்து 165 ரன் எடுத்தது. தூத்துக்குடி தரப்பில் கணேஷ் மூர்த்தி 2, வாஷிங்டன் சுந்தர், ஆகாஷ் சும்ரா தலா 1 விக்கெட் வீழ்த்தினர்.

கடின இலக்கை துரத்திய தூத்துக்குடி அணிக்கு வாஷிங்டன் சுந்தர், காந்தி இருவரும் சிறப்பான துவக்கம் கொடுத்தனர். சுந்தர் 38 ரன் எடுத்த நிலையில் சிலம்பரசன் பந்தில் ஆட்டமிழந்தார். இதைப் பயன்படுத்தி அடுத்து வந்த தினேஷ் கார்த்திக் 21 பந்தில் 5 பவுண்டரி, 1 சிக்சர் உட்பட 36 ரன் எடுத்த  நிலையில், ராகில் ஷா ‘சுழலில்’ சிக்கினார். சந்ததோஷ் ஷிவ் (0), அரவந்த் (2) ஆட்டமிழந்தனர். 3 ஓவரில் 22 ரன் தேவைப்பட்டது. தொடர்ந்து அசத்திய  காந்தி தண்வார் பந்தில் சிக்சர் அடித்து அணியின் வெற்றியை உறுதி செய்தார். முடிவில் தூத்துக்குடி அணி 19.1 ஓவரில் 4 விக்கெட் இழப்புக்கு 171 ரன்  எடுத்து 6வது வெற்றியை பதிவு செய்து அசத்தியது. காந்தி 52 (42 பந்து, 3 பவுண்டரி, 1 சிக்சர்), ஆனந்த் 19 (11 பந்து, 1 பவுண்டரி, 1 சிக்சர்) ரன் எடுத்து ஆட்டமிழக்காமல் இருந்தனர். திருவள்ளூர் தரப்பில் சிலம்பரசன், ராகில் ஷா தலா 2 விக்கெட் வீழ்த்தினர். பேட்டிங்கில் அசத்திய காந்தி ஆட்டநாயகனாக  தேர்வு செய்யப்பட்டார்.

தூத்துக்குடி அணி இதுவரை விளையாடிய 6 போட்டிகளிலும் வெற்றி பெற்று மொத்தம் 12 புள்ளிகளுடன் புள்ளிப் பட்டியலில் தொடர்ந்து முதலிடத்தில் நீடிக்கிறது. ஏற்கனவே இந்த அணி ‘பிளே&ஆப்’ சுற்றுக்கு முன்னேறி விட்டது. திருவள்ளூர் அணி 5 போட்டிகளில் 2 வெற்றி, 3 தோல்வி என 4  புள்ளிகளுடன் 4வது இடத்தில் நீடிக்கிறது.