திண்டுக்கல் அசத்தல் வெற்றி

பதிவு செய்த நாள் : 06 ஆகஸ்ட் 2017

திருநெல்வேலி

திருச்சி அணிக்கு எதிரான டி.என்.பி.எல்., ‘டுவென்டி-20’ தொடரின் லீக் ஆட்டத்தில் கேப்டன் வெங்கட்ராமன் 34 பந்தில் 41 ரன் விளாச திண்டுக்கல் 23 ரன்  வித்தியாசத்தில் வெற்றி பெற்றது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 17வது லீக் ஆட்டம் திருநெல்வேலியில் உள்ள இந்தியா சிமென்ட்ஸ் மைதானத்தில் இன்று பிற்பகல் நடைபெற்றது. இதில், திண்டுக்கல் அணியை எதிர்த்து திருச்சி மோதியது. ‘டாஸ்’ வென்ற திண்டுக்கல் கேப்டன் வெங்கட்ராமன் முதலில் ‘பேட்டிங்கை’ தேர்வு செய்தார். திண்டுக்கல் அணிக்கு கங்கா ஸ்ரீதர் ராஜூ (1), சுப்ரமணிய சிவா (19) இருவரும் சுமாரான துவக்கம் தந்தனர். பின் இணைந்த ஜெகதீசன், கேப்டன் வெங்கட்ராமன் ஜோடி பொறுப்புடன் விளையாடி ரன் எடுத்து வந்தது. ஜெகதீசன் 22 ரன் எடுத்த நிலையில், பிரபு பந்துவீச்சில் அவரிடமே கேட்ச் கொடுத்து ஆட்டமிழந்தார். அரைசதம் அடிப்பார் என எதிர்பார்த்த வெங்கட்ராமன் 41 ரன் (34 பந்து, 2 பவுண்டரி, 2 சிக்சர்) எடுத்து வெளியேறினார். விக்டர் (9), சன்னி குமார் சிங் (2) சொதப்பினர்.கடைசி கட்டத்தில் விவேக் (32), ஆதித்யா அருண் (17*) கைகொடுக்க திண்டுக்கல் அணி 20 ஓவரில் 7 விக்கெட் இழப்புக்கு 154 ரன் எடுத்தது. திருச்சி தரப்பில் ஜேசுராஜ், கவுசிக், பிரபு தலா 2 விக்கெட் வீழ்த்தினர்.

எளிதான இலக்கை துரத்திய திருச்சி அணிக்கு தொடக்கம் சிறப்பாக அமையவில்லை. பரத் சங்கர் (2) ஏமாற்றினார். கேப்டன் இந்திரஜித் (17), ஆதித்ய கிரிதர் (16), நிலேஷ் சுப்ரமணியம் (11), அகில் ஸ்ரீநாத் (0) சொதப்பினர். முக்கிய கட்டத்தில் கவுசிக் (25), ஆதித்ய கணேஷ் (24) ஓரளவு கைகொடுத்தனர். கடைசி கட்டத்தில் திண்டுக்கல் எழுச்சியுடன் பந்து வீச திருச்சி அணி 20 ஓவரில் 7 விக்கெட் இழப்புக்கு 131 ரன் எடுத்து பரிதாபமாக தோற்றது. பிரபு (25), கவுசிக் (2) ஆட்டமிழக்காமல் இருந்தனர். திண்டுக்கல் தரப்பில் சன்னி குமார் சிங், விக்டர் தலா 2, நடராஜன், சஞ்சய், கிஷன் குமார் தலா 1 விக்கெட் வீழ்த்தினர். பேட்டிங்கில் அசத்திய திண்டுக்கல் கேப்டன் வெங்கட்ராமன் ஆட்டநாயகனாக தேர்வு செய்யப்பட்டார்.

இந்த வெற்றியின் மூலம் திண்டுக்கல் அணி (5 போட்டி, 2 வெற்றி, 2 தோல்வி, ஒரு போட்டி ரத்து) மொத்தம் 5 புள்ளிகள் பெற்றுள்ளது. அதே நேரம் 4 போட்டிகளில் விளையாடி உள்ள திருச்சி அணி 1 வெற்றி, 3 தோல்வி என மொத்தம் 2 புள்ளிகளுடன் 7வது இடத்தில் நீடிக்கிறது.