பிளே-ஆப் சுற்றில் தூத்துக்குடி

பதிவு செய்த நாள் : 04 ஆகஸ்ட் 2017

திருநெல்வேலி

கோவை அணிக்கு எதிரான டி.என்.பி.எல்., ‘டுவென்டி-20’ தொடரின் லீக் ஆட்டத்தில் 6 விக்கெட் வித்தியாசத்தில் வெற்றி பெற்ற தூத்துக்குடி ‘பிளே-ஆப்’  சுற்றுக்கு முன்னேறியது. தவிர இந்த அணி தொடர்ச்சியாக 5 போட்டிகளில் வெற்றி பெற்று அசத்தியது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 15வது லீக் ஆட்டம் திருநெல்வேலியில் உள்ள இந்தியா சிமென்ட்ஸ் மைதானத்தில் இன்று நடைபெற்றது. இதில், தூத்துக்குடியை எதிர்த்து  கோவை அணி மோதியது. ‘டாஸ்’ வென்ற கோவை கேப்டன் சூர்யபிரகாஷ் முதலில் ‘பேட்டிங்கை’ தேர்வு செய்தார். கோவை அணிக்கு துவக்கம் சிறப்பாக  அமையவில்லை. ராஜன் பால் (3), கேப்டன் சூர்யபிரகாஷ் (7) சொற்ப ரன்னில் ஆட்டமிழந்தனர். இதையடுத்து களம் வந்த அணிருத் சீதாராம் (21), விக்கெட்கீப்பர் ரோகித் (22) ஓரளவு கைகொடுத்தனர். தீபன் லிங்கேஷ் (9) பரிதாபமாக ரன் அவுட் ஆனார். சீரான இடைவெளியில் விக்கெட்டுகள் சரிய  சீனிவாசனுடன் ஹரீஷ் குமார் இணைந்தார். அதிரடியாக விளையாடிய சீனிவாசன் அரைசதம் அடித்து சரிவிலிருந்து அணியை மீட்டார். இவருக்கு ஹரீஷ்  குமார் கம்பெனி கொடுத்தார்.

சீனிவாசன் 52 ரன் (36 பந்து, 7 பவுண்டரி, 1 சிக்சர்) எடுத்த நிலையில், டேவிட்சன் பந்தில் ஆட்டமிழந்தார். கடைசி கட்டத்தில் ஹரீஷ் குமார் (33), முகமது (4) ஆட்டமிழக்காமல் இருந்தனர். முடிவில் கோவை அணி 20 ஓவரில் 6 விக்கெட் இழப்புக்கு 160 ரன் எடுத்தது. தூத்துக்குடி தரப்பில் வாஷிங்டன் சுந்தர்,  டேவிட்சன் தலா 2, அவுசிக் ஸ்ரீனிவாஸ் 1 விக்கெட் வீழ்த்தினர்.

எளிதான இலக்கை துரத்திய தூத்துக்குடி அணிக்கு வாஷிங்டன் சுந்தர், காந்தி இருவரும் சிறப்பான துவக்கம் தந்தனர். காந்தி அதிரடியில் இறங்க ஸ்கோர் ராக்கெட் வேகத்தில் பறந்தது. பின் வாஷிங்டன் சுந்தரும் டாப்-கியரில் எகிற ரசிகர்கள் ஆர்ப்பரித்தனர். ஆட்டத்தின் 10வது ஓவரை அருண் வீசினார். இந்த  ஓவரில் வாஷிங்டன் சுந்தர் (35), காந்தி (44) அடுத்தடுத்து ஆட்டமிழந்தனர். இந்த ஜோடி முதல் விக்கெட்டுக்கு 80 ரன் (10 ஓவர்) சேர்த்தது. இதையடுத்து  கேப்டன் தினேஷ் கார்த்திக்குடன் சந்தோஷ் ஷிவ் இணைந்தார். ஷிவ் 7 ரன்னில் வெளியேற கார்த்திக் அதிரடியில் இறங்கினார். ஒரு சிக்சர் உட்பட 8 ரன்  எடுத்த நிலையில், ஆனந்த் வெளியேற ஆட்டம் பரபரப்பானது. 5 ஓவரில் 43 ரன் தேவைப்பட்டது.

இந்த சவாலை ஏற்ற கார்த்திக் எதிரணி பந்து வீச்சை நாலா புறமும் பறக்கச் செய்தார். இதையடுத்து தூத்துக்குடி அணி 18.3 ஓவரில் 4 விக்கெட் இழப்புக்கு 164 ரன் எடுத்து வெற்றி பெற்றது. தினேஷ் கார்த்திக் 47 (28 பந்து, 6 பவுண்டரி, 1 சிக்சர்), நாதன் 15 (10 பந்து, 1 சிக்சர்) ரன் எடுத்து ஆட்டமிழக்காமல் இருந்தனர். கோவை தரப்பில் அருண் 2, முகமது, அஜித்ராம் தலா 1 விக்கெட் வீழ்த்தினர். தினேஷ் கார்த்திக் ஆட்டநாயகனாக தேர்வு செய்யப்பட்டார்.

நடப்பு சாம்பியன் தூத்துக்குடி அணி இதுவரை விளையாடிய ஐந்து லீக் போட்டிகளிலும் வெற்றி பெற்று மொத்தம் 10 புள்ளிகளுடன் புள்ளிப் பட்டியலில் முதல் இடத்தில் இருப்பதோடு அடுத்த சுற்றான ‘பிளே-ஆப்’ சுற்றுக்கு முன்னேறியது. அதே நேரம் கோவை அணி நான்கு போட்டிகளில் ஒரு வெற்றி, 2  தோல்வி, ஒரு போட்டி ரத்து என மொத்தம் 3 புள்ளிகளுடன் 6வது இடத்தில் உள்ளது.