அனிருத் அதிரடி: காரைக்குடி வெற்றி

பதிவு செய்த நாள் : 03 ஆகஸ்ட் 2017

திண்டுக்கல்

திருவள்ளூர் அணிக்கு எதிரான டி.என்.பி.எல்., ‘டுவென்டி-20’ லீக் தொடரில் அனிருத் ஸ்ரீகாந்த் 35 பந்தில் 55 ரன் விளாச காரைக்குடி 3 விக்கெட் வித்தியாசத்தில் வெற்றி பெற்றது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள்  அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 13வது லீக் ஆட்டம் திண்டுக்கல் என்.பி.ஆர்., கல்லூரி மைதானத்தில் இன்று பிற்பகல் நடைபெற்றது. இதில், காரைக்குடியை எதிர்த்து திருவள்ளூர் அணி மோதியது. ‘டாஸ்’ வென்ற திருவள்ளூர் முதலில் ‘பேட்’ செய்தது. திருவள்ளூர் அணிக்கு சதுர்வேத் (45), சிதாரத் (18) சிறப்பான   துவக்கம் தந்தனர். கேப்டன் அபராஜித் (39) ராஜ்குமார் பந்தில் கிளீன் போல்டானார். முக்கிய கட்டத்தில் சுஜாய் (0), விக்கெட்கீப்பர் கவின் (9) சொதப்பினர். சஞ்சய் யாதவ் (18) பரிதாபமாக ரன் அவுட் ஆனார். கடைசி நேரத்தில் ரஙகராஜன் 10 பந்தில் 2 சிக்சர் உட்பட ஆட்டமிழக்காமல் 21 ரன்  எடுத்து கைகொடுத்தார். ஆட்டத்தின் கடைசி ஓவரின் கடைசி பந்தில் லட்சுமி நாராயணன் (7) ரன் அவுட் ஆக திருவள்ளூர் அணி 20 ஓவரில் 7 விக்கெட் இழப்புக்கு 167 ரன் எடுத்தது. காரைக்குடி தரப்பில் சோனு யாதவ் 2, ராஜ்குமார், கணபதி, ஷியாம் தலா 1 விக்கெட் வீழ்த்தினர்.

கடின இலக்கை துரத்திய விஷால் வைத்யா, அனிருத் ஸ்ரீகாந்த் இருவரும் சிறப்பான துவக்கம் தந்தனர். இந்த ஜோடி முதல் விக்கெட்டுக்கு 54 ரன் (5.2 ஓவர்) சேர்த்த நிலையில், விஷால் வைத்யா 29 ரன் (17 பந்து, 3 பவுண்டரி, 2 சிக்சர்) ஆட்டமிழந்தார். அடுத்து வந்த கேப்டன் பத்ரிநாத் (11) ஏமாற்றினார். சீனிவாசன் (8) பரிதாபமாக ரன் அவுட் ஆனார். முக்கிய கட்டத்தில் ஷாஜகான் (28), கணபதி (25) கைகொடுத்தனர். தொடர்ந்து அசத்திய அணிருத் ஸ்ரீகாந்த் அரைசதம் அடித்து அசத்தினார். ராஜ்குமார் (1), சானு யாதவ் (5) ஆட்டமிழந்தனர். இருந்தும் காரைக்குடி அணி 19.3 ஓவரில் 7 விக்கெட் இழப்புக்கு 168 ரன் எடுத்து வெற்றி பெற்றது. அனிருத் ஸ்ரீகாந்த் 55 ரன் (35 பந்து, 2 பவுண்டரி, 6 சிக்சர்), சுவாமிநாதன் (0) ஆட்டமிழக்காமல் இருந்தனர். திருவள்ளூர் தரப்பில் தண்வர், ராகில் ஷா தலா 2, சிலம்பரசன், சஞசய் யாதவ் தலா 1 விக்கெட் வீழ்த்தினர். அரைசதம் அடித்த அனிருத் ஸ்ரீகாந்த் ஆட்டநாயகனாக தேர்வு செய்யப்பட்டார்.