சுந்தர் ‘சூப்பர்’ சதம்: தூத்துக்குடி வெற்றி

பதிவு செய்த நாள் : 02 ஆகஸ்ட் 2017

திருநெல்வேலி

சேப்பாக்கம் அணிக்கு எதிரான டி.என்.பி.எல்., ‘டுவென்டி-20’ தொடரில் வாஷிங்டன் சுந்தர் சதம் (107) அடித்து கைகொடுக்க தூத்துக்குடி 4வது வெற்றியை  பதிவு செய்து அசத்தியது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது  இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை,  மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற  அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 12வது லீக் ஆட்டம் நெல்லையில் உள்ள இந்தியா சிமென்ட்ஸ் மைதானத்தில் இன்று நடைபெற்றது. இதில், சேப்பாக்கம் அணியை எதிர்த்து  தூத்துக்குடி மோதியது. ‘டாஸ்’ வென்ற தூத்துக்குடி கேப்டன் தினேஷ் கார்த்திக் முதலில் ‘பேட்டிங்கை’ தேர்வு செய்தார். தூத்துக்குடி அணிக்கு வாஷிங்டன்  சுந்தர், கவுசிக் காந்தி இருவரும் சிறப்பான துவக்கம் தந்தனர். இருவரும் அதிரடியாக விளையாடி அசத்தினர். குறிப்பாக, வாஷிங்டன் சுந்தர் ‘ருத்ரதாண்டவம்’ ஆடினார். தவிர அரைசதம் அடித்தார். இந்த ஜோடி முதல் விக்கெட்டுக்கு 107 ரன் (12.1 ஓவர்) சேர்த்த நிலையில், காந்தி ஆட்டமிழந்தார்  இவர் 35 ரன் (33 பந்து, 3 பவுண்டரி, 1 சிக்சர்) எடுத்தார். அடுத்து வந்த கேப்டன் தினேஷ் கார்த்திக் ‘டக்-அவுட்’ ஆனார். ஆனந்த் (13) ஏமாற்றினார்.

தொடர்ந்து அசத்திய வாஷிங்டன் சுந்தர் சதம் அடித்தார். இவர் 107 ரன் (61 பந்து, 11 பவுண்டரி, 4 பவுண்டரி) எடுத்த நிலையில், பரிதாபமாக ரன் அவுட்  ஆனார். கடைசி கட்டத்தில் ஆகாஷ் சும்ரா (15*), நாதன் (1*) கைகொடுக்க தூத்துக்குடி அணி 20 ஓவரில் 4 விக்கெட் இழப்புக்கு 178 ரன் எடுத்தது.  சேப்பாக்கம் தரப்பில் அலெக்சாண்டர் 2, சாய் கிஷோர் 1 விக்கெட் வீழ்த்தினர்.

கடின இலக்கை துரத்திய சேப்பாக்கம் அணிக்கு தொடக்கம் சிறப்பாக அமையவில்லை. கோபிநாத் (1), கேப்டன் சதீஷ் (0) இருவரும் சொதப்பினர். ஆண்டனி தாஸ் (43) ஓரளவு கைகொடுத்தார். தலைவன் சற்குணம் (19), சரவணன் (8), சசிதேவ் (10) ஏமாற்றினர். 13வது ஓவரில் சேப்பாக்கம் அணி 100 ரன் கடந்தது. இருந்தும் முக்கிய கட்டத்தில் கார்த்திக் அதிரடியில் இறங்க ஆட்டம் பரபரப்பானது. யோ மகேஷ் (8), சாய் கிஷோர் (0) அடுத்தடுத்து ஆட்டமிழக்க கடைசி ஓவரில் 30 ரன் தேவைப்பட்டது. கடைசி ஓவரை வாஷிங்டன் சுந்தர் அபாரமாக வீச, சேப்பாக்கம் அணி 20 ஓவரில் 8 விக்கெட்  இழப்புக்கு 151 ரன் எடுத்து பரிதாபமாக தோற்றது. கார்த்திக் 39 (35 பந்து, 1 பவுண்டரி, 2 சிக்சர்), ஜோசப் 8 (3 பந்து, 1 சிக்சர்) ரன் எடுத்து ஆட்டமிழக்காமல் இருந்தனர். தூத்துக்குடி தரப்பில் அவுசிக் ஸ்ரீனிவாஸ், டேவிட்சன் தலா 2, லட்சுமண், வாஷிங்டன் சுந்தர் தலா 1 விக்கெட் வீழ்த்தினர். பேட்டிங்,  பவுலிங் இரண்டிலும் கலக்கிய வாஷிங்டன் சுந்தர் ஆட்டநாயகனாக தேர்வு செய்யப்பட்டார்.

தூத்துக்குடி அணி இதுவரை விளையாடிய நான்கு போட்டிகளிலும் வெற்றி பெற்று மொத்தம் 8 புள்ளிகளுடன் புள்ளிப் பட்டியலில் தொடர்ந்து முதல்  இடத்தில் உள்ளது. சேப்பாக்கம் அணி மூன்று போட்டிகளில் 2 வெற்றி, ஒரு தோல்வி என மொத்தம் 4 புள்ளிகள் பெற்றுள்ளது.