திண்டுக்கல்-கோவை ஆட்டம் ரத்து

பதிவு செய்த நாள் : 01 ஆகஸ்ட் 2017

திண்டுக்கல்

டி.என்.பி.எல்., தொடரில் திண்டுக்கல்-கோவை இடையேயான லீக் ஆட்டம் மழையால் ரத்தானது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் பதினோறாவது லீக் ஆட்டம் திண்டுக்கல் என்.பி.ஆர்., கல்லூரி மைதானத்தில் இன்று நடைபெற இருந்தது. இதில், திண்டுக்கல் அணியை எதிர்த்து கோவை விளையாட இருந்தது. இன்று மாலை முதலே திண்டுக்கல்லில் பலத்த மழை பெய்து வந்தது. இதனால், ஆட்டம் துவங்க தாமதம் ஆனது. தொடர்ந்து மயை பெய்ய ஆட்டத்தை ரத்து செய்வதாக நடுவர்கள் அறிவித்தனர். இதையடுத்து, இரு அணிகளுக்கும் தலா 1 புள்ளி வழங்கப்பட்டது.