திண்டுக்கலிடம் மதுரை சரண்டர்

பதிவு செய்த நாள் : 26 ஜூலை 2017

திண்டுக்கல்

மதுரை அணிக்கு எதிரான டி.என்.பி.எல்., ‘டுவென்டி-20’ தொடரின் லீக் ஆட்டத்தில் சுப்பரமணிய சிவா 41 பந்தில் 84 ரன் விளாச திண்டுக்கல் 10 விக்கெட் வித்தியாசத்தில் இமாலய வெற்றியை பதிவு செய்து அசத்தியது.

இந்தியா சிமண்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பங்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் நான்காவது லீக் ஆட்டம் திண்டுக்கல்லில் இன்று நடைபெற்றது. இதில், மதுரையை எதிர்த்து திண்டுக்கல் அணி மோதியது. ‘டாஸ்’ வென்ற மதுரை கேப்டன் அருண் கார்த்திக் முதலில் ‘பேட்டிங்கை’ தேர்வு செய்தார். மதுரை அணிக்கு சன்னி குமார் சிங், வேகத்தில் தொல்லை கொடுத்தார். இவரது வேகத்தில் கேப்டன் அருண் கார்த்திக் (6), சிவராமகிருஷ்ணன் (16), சந்திரன் (4) ஆட்டமிழந்தனர். சஞ்சய் பந்தில் ஷாருக்கான் (13) கிளீன் போல்டானார். பொறுப்புடன் விளையாடிய சுரேஷ் குமார் (39) ரன் எடுத்து முருகன் அஷ்வின் ‘சுழலில்’ சிக்கினார். இதன் பின் விக்கெட்டுகள் சீட்டுகட்டாய் சரிந்தன. பிரான்சிஸ் ரோக்கின்ஸ் (3), செந்தில்நாதன் (0), முருகானந்தம் (0), சந்திரசேகர் (1) சொதப்பினர். கடைசி கட்டத்தில் விக்னேஷ் (28)     கைகொடுக்க மதுரை அணி 19.1 ஓவரில் 117 ரன்னுக்கு ஆட்டமிழந்தது. அமர்நாத் (1) ஆட்டமிழக்காமல் இருந்தார். திண்டுக்கல் தரப்பில் சன்னி குமார் சிங் 3, முருகன் அஷ்வின், நடராஜன், சஞ்சய் தலா 2 விக்கெட்டுகள் வீழ்த்தினர்.

எளிதான இலக்கை துரத்திய திண்டுக்கல் அணிக்கு தொடக்க வீரர் சுப்ரமணிய சிவா ‘ருத்ரதாண்டவம்’ ஆடினார். இவர் எதிரணி பந்து வீச்சை அடித்து நொறுக்க ஸ்கோர் ராக்கெட் வேகத்தில் பறந்தது. தவிர, சிக்சர், பவுண்டரி என விளாச உள்ளூர் ரசிகர்கள் ஆர்ப்பரித்தனர். இவருக்கு எப்படி பந்து வீசுவது என தெரியாமல் மதுரை பவுலர்கள் திகைத்தனர். இவருக்கு கங்கா ஸ்ரீதர் ராஜூ கம்பெனி கொடுத்தார். அபார ஆட்டத்தை வெளிப்படுத்திய சிவா அரைசதம் அடித்து அசத்தினார். தவிர திண்டுக்கல் அணி 8.2 ஓவரில் 100 ரன் எடுத்தது. இருவரும் தொடர்ந்து அசத்த திண்டுக்கல் அணி 10.3 ஓவரில்  விக்கெட் இழப்பின்றி 120 ரன்கள் எடுத்து 10 விக்கெட் வித்தியாசத்தில் இமாலய வெற்றி பெற்றது. சுப்ரமணிய சிவா 84 (41 பந்து, 10 பவுண்டரி, 6 சிக்சர்), கங்கா ஸ்ரீதர் ராஜூ 32 (22 பந்து, 4 பவுண்டரி, 1 சிக்சர்) ரன் எடுத்து ஆட்டமிழக்காமல் இருந்தார். அதிரடியாக விளையாடிய சுப்ரமணிய சிவா ஆட்டநாயகனாக தேர்வு செய்யப்பட்டார்,

இந்த தொடரி திண்டுக்கல் அணி பெறும் முதல் வெற்றி இதுவாகும். தூத்துக்குடிக்கு எதிரான தொடக்க லீக் ஆட்டத்தில் திண்டுக்கல் பரிதாபமாக தோற்றது நினைவிருக்கும். மதுரை அணி தோல்வியுடன் தொடரை துவக்கி உள்ளது.